भांगरभूंय | प्रतिनिधी
थंय वतकच कांय वर्सां भितर रीण फारीक जातलें, असो दरेकल्याक विस्वास आशिल्लो. मात आतां बाबाय ना आनी पुडवेंय ना, असो प्रकार जाला.
अमेरिकेंत नवें सरकार आयलें. डोनाल्ड ट्रम्प अध्यक्षपदाच्या कदेलाचेर बसले आनी तांणी पयल्या दिसा सावन धडाधड निर्णय घेवपाक सुरवात केली. ‘अमेरिकन फर्स्ट’ हें नव्या सरकाराचें धोरण. ताचेर विरोधक आनी सत्ताधारी गटांतल्या ट्रम्प समर्थकांनीय टिका केल्या. मात, स्वताच्या निर्णयाचेर ठाम रावन ट्रम्प हांणी आपले एकेक निर्णय चालीक लावपाक सुरवात केल्या. बेकायदेशीर स्थलांतरितांक धांवडावप हो तातूंतलो एक म्हत्वाचो निर्णय. आमकां भारतीयांक तो माल पडूं शकता, अशी भिरांत उक्तावन 15 दीस जाता थंय आसात, रोखडेंच अमेरिकेचें एक विमान 104 जाणांक घेवन भारतांत आयलें. सहकुटुंब सहपरिवार म्हणटात तशी ह्या भारतीयांची घरवापसी जाल्या. कांय जाणांक हो निर्णय आवडला, थोड्यांक आवडूंक ना. मात, हे बेकायदेशीर स्थलांतरीत भारतीय खऱ्या अर्थान त्रासांत पडल्यात. बेकायदेशीर कामा खातीर ख्यास्त ही जावपाकूच जाय, ही गजाल खरी. पूण हे लोक थंय गुन्यांव करपाक वचूंक नाशिल्ले, तर पोट भरपाक गेल्ले, हेंय मतींत घेवचें पडटलें.
बऱ्याच लोकांक अमेरिकेचो, कॅनडाचो मोनेळ पडिल्लो पळोवपाक मेळटा. थंय वचून रावचें, नोकरी करची, शिक्षण घेवचें, अशेंय तांकां दिसता. तातूंत वायट कांय ना. पूण हें सगलें कायदेशीर पद्दतीन जावंक नाका? खंयच्या तरी एजंटाक हाता कडेन धरून थंय वचप चुकीचें. थोडे शिक्षणाक म्हूण वतात आनी थंय नोकरी, वेवसाय करतात. कांय लोक गुन्यांवकारी कारवायांनी घुस्पल्ल्याचो आरोप ट्रम्प प्रशासनान केला. तांच्या अदमासा प्रमाण, सध्या अमेरिकक पांच कोटीं वयर बेकायदेशीर स्थलांतरीत आसात. तातूंत 28 लाख खंय भारतीय. मेक्सिकोचे एक कोटी जाल्यार चीनाचे 22 लाख. हो अदमास. आतां एकेक करून सगल्यांक घरा धाडपाची तयारी चालू जाल्या. बुधवारा भारतीयांक खाशेल्या विमानान धाडल्यात, तांचेर खंय अमेरिकेक भारतीय चलनांत 6 कोटी रुपया मोडचे पडल्यात.
अमेरिका पयलीं 205 बेकायदेशीर भारतीयांक परत धाडटली. सध्या 186 जाणांची वळेरी तयार आसा. उरिल्ल्या लोकांक सोदपाचें काम सध्या चलता. कारण ते देशांत नेमके खंय आसात, तें अमेरिकी प्रशासनाक खबर ना. सरकारी यंत्रणा म्हणटा, आमी 19 हजार भारतीयांक परत धाडटले. तांकां आनी हेर देशांतल्या लोकांक परत तांच्या देशांनी धाडपाक अमेरिकेक अब्जांनी रुपया खर्च येतलो. 12 फेब्रुवारीक प्रधानमंत्री नरेंद्र मोदी अमेरिकेचे भोंवडेर वचपाचे आसात. दुसरे दीस ते ट्रम्प हांकां मेळटले. त्या वेळार ह्या स्थलांतरितांचेर उलोवणी जातलीच. पूण बेकायदेशीर स्थलांतराच्या प्रस्नाचेर पड्डो घालप तशें शक्य जावचें ना.
बेकायदेशीर स्थलांतर करपी भारतीयांचें बायोमेट्रीक स्कॅन (हाताचे ठशे, मुखामळाचो फोटो) घेतलां. म्हणटकच फाल्यां वैध कागदां करुनय तांणी अमेरिकेंत वचपाचें थारायलें जाल्यारूय तांकां व्हिसा मेळत हाची खात्री ना. हेर 20 देशांनीय (कॅनडा, ब्रिटन, आॅस्ट्रेलिया……) वचपाक मेळचें ना. कारण तांचेय धोरण अमेरिकेच्या व्हिसा धोरणा सारकेंच. हे लोक नेमके कित्याक अमेरिकेक गेल्ले, ताचो तपास भारतांत जातलो. कारण बऱ्याच लोकांक गुन्यांव करून भायर पळपाची संवय आसा. ते नेमके थंय कशे पावले, कायदेशीर कागदां करिनासतना भायर कशे गेले, हे खातिरूय कारवाय जावं येता. अमेरिकेन तांकां धाडल्यात खरे, पूण तांकां हातपांय बांदून विमानांत चडयिल्ले खंय. 40 वरांचो प्रवास करून आयिल्ल्या भारतियांनी प्रसार माध्यमांक ते विशीं म्हायती दिल्या. कांय जाणांक बेडयो घाल्ल्यो. तांचे दोळे धांपिल्ले. एखाद्या खुन्याक वा आतंकवाद्याक हाडचो, तशे आमकां हाडले, अशेंय कांय भारतियांनी सांगलें. हे लोक थंय लिपचोरयां गेल्यात. ते खातीर तांणी 30 ते 50 लाख रुपया एजंटांक दिल्यात. थोड्यांनी ते खातीर शेतां, भाटां, घरां, वस्ती विकल्यात. थंय वतकच कांय वर्सां भितर रीण फारीक जातलें, असो दरेकल्याक विस्वास आशिल्लो. मात आतां बाबाय ना आनी पुडवेंय ना, असो प्रकार जाला. जांची घरची परिस्थिती बरी आसा, ते सुटले, पूण हेरांचें कितें? घर, शेत विकिल्ल्यां मुखार तर संकश्टूच उबें रावलां.
बेकायदेशीर भारतियांक परत धाडटले. पूण, थंय कायदेशीर पद्दतीन रावतात, नोकरी करतात, तांचेरूय संकश्ट येवपाची शक्यताय न्हयकारपाक जायना. कारण ‘अमेरिकन फर्स्ट’ मोहीम येत्या त्या कांय दिसांनी तेंगशेर पावतली. फक्त स्थलांतरितांचोच प्रस्न ना. ग्रीन कार्ड, एच 1 बी व्हिसा, जल्मान मेळपी नागरिकत्व रद्द….. आतां आनीक कसलीं ट्रम्प कार्डां भायर सरपाचीं आसात, तें तांकांच खबर!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
