भांगरभूंय | प्रतिनिधी
आसगांव पंचायतीची भौशीक नोटीस
म्हापशेंः राज्यांत बंदी घातिल्ल्या पिटबुल, रॉटवेलर सारक्या हिंसक सुण्यांक गांवांत मेकळे सोडल्यार दंडात्मक कारवाय करतले, अशी भौशीक नोटीस आसगांव पंचायतीन जारी केल्या. हालींच बादें हांगा रॉटवेलर सुण्यान एका मनशाचेर केल्ल्या हल्ल्याचे फाटभूंयेर पंचायतीन हें पावल उबारलां.
पिटबूल, रॉटवेलर आनी हेर जातींचे पोशिल्ले सुणे आशिल्ल्या नागरिकांक तांच्या पोशिल्ल्या सुण्यां वांगडा उक्त्यार, भौशीक सुवातांचेर भोंवपाक पंचायतीन मनाय केल्या. बादें-आसगांवच्या एका ४० वर्सां पिरायेच्या मनशाचेर रॉटवेलर सुण्यान हल्लो केल्लो. हाका लागून तो जखमी जाल्लो.
हे विशीं हणजूण पुलिसांनी सुण्याच्या धनया आड गुन्यांव दाखल केल्लो. ही घडणूक फाटल्या २९ जानेवारीक घडिल्ली. एका रॉटवेलर सुण्यान पिडेस्त विनिल साळगांवकार हाच्या पांयांक घास मारिल्लो. हे विशीं पिडेस्त साळगांवकार हांचो भाव सुनील साळगांवकार हांणी पुलिशेंत कागाळ केल्ली. हे घडणुकेची दखल घेवन आसगांव पंचायतीन गांवांत अश्या घडणुकांक आळो घालपाक भौशीक नोटीस जारी केल्या.
सरपंच हनुमंत नायक हांणी सांगलें : ज्या थळाव्यां कडेन सरकारन बंदी घातिल्ले विशीश्ट जातीचे सुणे आसात, तांचे खातीर आमी भौशीक सुचोवणी जारी केल्या. कारण भौशीक सुवातेर भोंवतना ते सामान्य जनते खातीर धोको निर्माण करतात. आमी पिटबुल, रॉटवेलर आनी हेर सुण्यांच्यो विशिश्ट जाती आशिल्ल्या थळाव्यां कडेन मागतां, तांणी पोशिल्ल्या सुण्यांक खंयच उक्त्या वा भौशीक सुवातांचेर सोडचें न्हय. जर हे नेम मोडल्यार हो दंडा सयत गुन्यांव थारतलो अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
