भांगरभूंय | प्रतिनिधी
पणजी: फुकट गॅस सिलिंडर कनेक्शन दिवपी प्रधानमंत्री उज्ज्वला येवजणेचो सुमार २ हजार गोंयकारांनी लाव घेतलो. नवें गॅस सिलिंडर कनेक्शन घेवपा खातीर हें लावार्थ्यांक सरकारान सिलिंडराच्या आकारा प्रमाण दर लाभार्थ्यांक १ हजार ते २ हजार मेरेन अनुदान दिलां. तशेंच हे सिलिंडर भरपा खातीर रु. ३०० इतलें अनुदान मेळटा, अशी म्हायती पेट्रोलियम आनी प्रकृतीक गॅस मंत्रालयान दिल्या.
राज्यसभेच्या पटलार लेखी जाप दितना पेट्रोलियम आनी प्रकृतीक गॅस मंत्री हरदीप पुरी हांणी सांगलें : देशांतल्या गरीब घराब्यांतल्या बायलांक डिपोजीट भरिनासतान फुकट गॅस सिलिंडर जोडणी दिवपाच्या हेतान प्रधानमंत्री उज्वला येवजण मे २०१६त चालीक लागिल्ली.
हे येवजणे खाला लाभार्थ्यांक नवें कनेक्शन घेतलें जाल्यार सिलिंडरा खातीर सेक्युरीटी डिपोजी, प्रेशर रेग्युलेटर, सुरक्षा पायप, डीजीसीसी बुकलेट आनी जोडणी शुल्क दिवाची गरज ना, ते पयशे सरकार भरता. अर्थीक वर्स २०२२-२३ मेरेन रु. १६०० दर लावार्थ्यां फाटल्यान सरकार खर्च करताले. आतां, अर्थीक वर्स २०२३-२४ उपरांत १४.२ किलो सिलिंडर फाटल्यान दर जोडणेक रु. २,२०० आनी ५ किलो सिलिंडरा फाटल्यान दर जोडणेंक रु. १,३०० इतले खर्च करतात.
ते भायर उज्वला येवजणेच्या लाभार्थ्यांक सिलिंडर भरप सवाय पडचे खातीर दर वर्सा सिलिंडर भरपा खातीर बारा फावटीं रु. २०० इतले अनुदान दिताले. उपरांत ओक्टोबर २०२३त ही सबसीडीच वाड करून दर वर्सा सिलिंडर भरपा खातीर बारा फावटीं रु. ३०० इतलें अनुदान मेळटा.
जानेर २०२५ मेरेन पुराय भारतांत १०.३३ कोटी लोकांनी उज्ज्वला योजणेचो लाव घेतला आनी तातुंतले १,९५५ गरजु गोंयकार बायलांक हे येवजणे खाला फुकट सिलिंडर जोडणी आनी सिलिंडर भरपाचेर अनुदान मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
