भांगरभूंय | प्रतिनिधी
पणजी : कायदो सुवेवस्थे सयत हेर म्हत्वाच्या प्रस्नांचेर चर्चा करपा खातीर दोन दिसांचो काळ उणो आशिल्ल्याचो आरोप करीत विरोधी आमदारांनी राज्यपालांच्या अभिभाशणा वेळार सभात्याग केलो. सभात्यागा वेळार जाल्ल्या बोवाळांतूच राज्यपाल पी. एस. श्रीधरन पिल्लई हांणी अभिभाशणाक सुरवात केली.
विधानसभेच्या दोन दिसांच्या अधिवेशनाक आयज सुरवात जाली. बिरेस्तार आनी शुक्रार अशे दोन दीस अधिवेशन चलतलें. नव्या वर्साचें पयलेंच अधिवेशन आशिल्ल्यान राज्यपालांच्या अभिभाशणान अधिवेशनाची सुरवात जाली. राष्ट्रगीता उपरांत राज्यपाल अभिभाशण करपाक उबे रावले तेन्ना विरोधी पक्ष फुडारी युरी आलेमाव हांणी कालावधीचो मुद्दो हाजीर केलो. केरळ विधानसभा वर्सांतल्यान सरासरी ५० दीस चलता. गोंय विधानसभेचें कामकाज मात वर्सांतल्यान सरासरी २६ दीस चलता. हो लोकशायेचो खून जावन आसा, अशें आलेमाव हांणी म्हणलें.
सभापती रमेश तवडकार हांणी तांका उलयतना मदींच आडयत कारवायेची शिटकावणी दिली. उपरांत कॉंग्रेस, आप आनी आरजीच्या आमदारान सभात्याग केली. गोवा फॉरवर्डचे आमदार विजय सरदेसाय हांणी आशिल्ले सुवातेरूच उबे रावन, हातांत तक्टो घेत निशेद केलो.
कांय काळा उपरांत आरजीचे आमदार विरेश बोरकार, आपचे आमदार वेंझी विएगस आनी क्रुज सिल्वा आनी कॉंग्रेसीचे आमदार कार्लोस फेरेरा हांणी सभाघरांत परत प्रवेश केलो आनी अभिभाशणाक हजर रावले. मात, विजय सरदेसाय हांणी हातांत तखटो घेवन आशिल्ले सुवातेरूच उबे रावन निशेध केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
