भांगरभूंय | प्रतिनिधी
पणजी : पणजेच्या पोरण्या लेखा संचालनालयांचे इमारतींत आशिल्ले स्टेट बँक ऑफ इंडियाच्या फांट्याक गोंय सरकारान धपको दिला. भौशीक बांदकाम विभागान नोटीस जारी करून बँके कडेन वट्ट २.८६ कोटी रुपयांच्या भाड्याची मागणी केल्या.
मेळिल्ले म्हायती प्रमाण, एसबीआयचो हो फांटो १९९७ वर्सा आदीं सावन दर म्हयन्याक ९७३ रुपया भाडें म्हणून सरकाराक दिता. मजगतीं १९९७ ते २०२५ ह्या काळांत वट्ट ५ खेपो प्लिथं एरियेचो (मालमत्तेचें वट्ट क्षेत्रफळ) दर बदल्ला. मात एसबीआयचो भाडेंदर तसोच उरलो.
मुख्यमंत्री डॉ. प्रमोद सावंत हांकां हे विशीं कळटांच तांणी बांदकाम विभागाक सुधारीत दरा प्रमाण थकबाकीची रक्कम वसूल करपाचे निर्देश दिले.हेच फाटभूंयेर आतां भौशीक बांदकाम विभागान नोटीस जारी करून एसबीआय कडेन २.८६ कोटी रुपयांच्या भाड्याची मागणी केल्या. तशेंच फेब्रुवारी २०२५ सावन मासीक भाडें १.६५ लाख निश्चीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
