दर्यां बरोबर गोंयची अध्यात्मा खातीर वळखः मुख्यमंत्री

भांगरभूंय | प्रतिनिधी

1200 प्रवाशांक घेवन गोंया सावन महाकुंभाक सुटली रेलगाडी

पणजीः गोंयांत सनातन धर्माचो विस्तार जावन गोंयची वळख फक्त दर्या मेरेन उरुंकना जाल्यार अध्यात्मा खातीर गोंयची वळख तयार जाल्या. प्रयागराज वचपी पयले रेलगाडयेंतल्यान सुमार 1200 गोंयकार महाकुंभाक गेल्यात. मागणी वाडली जाल्यार आनीक ट्रेनी सुरु करतले, अशें मुख्यमंत्री डॉ. प्रमोद सावंत हांणी सांगलें.
मुख्यमंत्री देवदर्शन येवजणे अंतर्गत गोंया सावन प्रयागराज महाकुंभ वचपी विशेष रेलगाडयेक करमळे रेल्वे स्टेशनार डॉ. सावंत हांणी पांचवो बावटो दाखयलो. ह्या वेळार समाज कल्याण मंत्री सुभाष फळदेसाय, आमदार दिगंबर कामत, आमदार राजेश फळदेसाय, कोंकण रेल्वेची प्रादेशिक मुखेली आशा शेट्टी आनी हेर मानेस्त हजर आशिल्ले.
128 वर्सा उपरांत आयिल्ल्या कुंभ मेळ्याक वचपाची संद सामान्य गोंयकारांक मेळची होच हेत दवरून गोंय सरकारान तीन रेलगाडयो प्रयागराज सोडल्यात. सुमार 1200 लोक पयलें रेलगाडयेंतल्यान महाकुंभात पवित्र स्नान करपा खातीर गेल्यात. फुडें अशींच रेलगाडी 13 आनी 21 फेब्रुवारींक सुट्टली. लोकांचो उत्साह आनीक वाडलो जाल्यार आनीक दोन रेलगाडयो सोडपाची सरकाराची इत्सा आसा, अशीं म्हायती मुख्यमंत्र्यांनी दिली.
गोंयाक दक्षीण काशी म्हूण वळखतात. सनातन संस्कृती लोक व्हड प्रमाणात आपणाक लागल्यात, ते सनातनी उत्सवांनी वांटेकारुय जातात. पयलीं ‘सन, सेंड अॅण्ड सी’ ही गोंयची वळख आशिल्ली, आतां गोंयाक अध्यात्मा खातीर वळखतात अशें मत मुख्यमंत्र्यान मांडले.
सनातन धर्माची वाड जाता आसतना सामान्य मनीस महाकुंभाक पावपाक जाय म्हूण रेलगाडयो सोडल्यात. उत्तर प्रदेश सरकार आनी मुख्यमंत्री योगी आदीत्यनाथ हांणी खूब बरी वेवस्था केल्या. काल प्रधानमंत्री नरेंद्र मोदी पवित्र स्नान करून आयले. म्हाकुंभाक गेल्ल्या सगळ्या गोंयकारांक म्हाकुंभात स्नान करपाक मेळटलें हें व्हड भाग्य, अशें मुख्यमंत्र्यांनी सांगलें.
जांकां म्हाकुंभाक वचपाचें आसा तांणी समाज कल्याण खात्यान जारी केल्ल्या नंबराचेर आपलें नांव नोंद करचें. समेस्त गोंयकार आनी सरकारा वतीन हांव म्हाकुंभा खातीर पेडणें ते काणकोण मेरेन जे लोक वतात तांकां परबीं भेटयता. तांणी आपले बरोबर आपल्या वांगड्यांचीय काळजी घेवची. एकठांय वतात तेन्ना सगळ्यांची काळजी घेवप ही दरेकाची जबाबदारी आसा, अशें मुख्यमंत्र्यान सांगलें.