भांगरभूंय | प्रतिनिधी
पोस्ट मास्टर जनरलान कांयच आयकून घेवंक नाशिल्ल्याची म्हायती
पेडणें : आदलो ४०३५१२ पिनकोड बदलून ४०३५१७ असो करपाच्या पोस्टाच्या निर्णया आड आगरवाडो-चोपडें पंचायतीन लढो सुरू केले उपरांत आतां पार्शेंचे लोक मुखार आयल्यात. हो लढो आनीक खर करपाचो संकल्प बुधवारा सांजेवेळार जाल्ले पार्शेंच्या नागरिकांचे बसकेंत घेतलो.
सरपंच अजय कळंगूटकार हांचे अध्यक्षते खाला घेतिल्ले हे बसकेक पार्शेंची उपसरपंच रेश्मा कांबळी, पंच सुनीता बुगडे देसाय, प्रज्ञा पार्सेकार, अजित मोरजकार, मधुसूदन सातार्डेंकार, स्वप्नील नायक, आदले सरपंच देवेंद्र प्रभुदेसाय हांचे सयत सुमार २५० ते ३०० नागरीक हजर आशिल्ले.
ह्या वेळार उलयतना वक्त्यांनी सांगलें, फकत एका पोस्टमना खातीर १५ हजार नागरिकांक त्रासांत घालपाचो पोस्टाचो हो निर्णय घातकी आसाच.
पिनकोड बदलिल्ल्यान १५ हजार नागरिकांक आधार कार्ड, मतदान वळख पत्र, पॅन कार्ड आनी हेर सरकारी आनी गरजेच्या कागद पत्रांत पिनकोड बदलचो पडटलो. हाका लागून बरेच त्रास सोंसचे पडटले. हातूंत वेळ आनी पयसोय वतलो. हातूंत पॅन कार्डांत बदल करप सामकें त्रासाचें जातलें.
आगरवाडो, चोपेडें आनी पार्शेचें टपाल पेडणेंच्यान हाडटना पोस्टमनाक पेडण्या वच्चें पडटा. ताचे खातीर हें काम सहज जावचें म्हणन हो बदल केला. हाका लागून पार्शेंच्या लोकांक आतां हाचे आड एकठांय आयले बगर कांयच जावपाचें ना, अशें सांगून वक्त्यांनी हो लढो खर करपा खातीर व्हडा संख्येन ह्या लढ्यांत वांटेकार जावपाची गरज आशिल्ल्याचें तांणी सांगलें.
हे खातीर २ ते ३ हजार नागरिकांचे मजतीचें निवेदन उत्तर गोंयचे खासदार तशेंच केंद्रीय मंत्री श्रीपाद नायक, थळावे आमदार जीत आरोलकार हांकां दिवपाचें थारायलें. तशेंच हो प्रस्न सोडोवपा खातीर नागरिकांची एक समिती निवडली.
ह्या वेळार सरपंच आनी पंचान म्हणलें, पणजेच्या मुखेल टपाल कार्यालयांतले पोस्ट मास्टर जनरलाक आमी जेन्ना मेळपाक गेले तेन्ना तांणी आमचें कांयच आयकूंक ना. हाका लागून हो प्रस्न सोडोवपाक हांगच्या नागरिकांनी एकठांय रावून यत्न करपाचें थारायलां. पंचायतीनूय हे खातीर फुडाकार घेतिल्ल्यान नागरिकांनी समाधान उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
