7 आनी 8 फेब्रुवारीक कला अकादेमींत ‘सुर जहान संगीत’ महोत्सव
भांगरभूंय | प्रतिनिधी
पणजी ः कला आनी सांस्कृती खात्यान 7 आनी 8 फेब्रुवारीक सुर जहान संगीत महोत्सव घडोवन हाडला. कला अकादेमींत जावपी ह्या महोत्सवांत थळावे, देशी आनी विदेशी कलाकार आपली कला सादर करतले अशें कला आनी सांस्कृतीक मंत्री गोविंद गावाडे हांणी सांगलें. बिरेस्तारा पणजेंत जाल्ले पत्रकार परिशदेंत ते उलयताले. ह्या वेळार खात्याचे संचालक सगुण वेळीप आनी अमिताव भट्टाचार्य हाजीर आशिल्ले.
मंत्री गावडे हांणी सांगलें, 7 फेब्रुवारीक सकाळीं 10.30 ते दनपारां 1 वरां मेरेन अंब्रेला एनसेंबल आनी अल मोलर ह्या संगीत बँडांतले कलाकार संगीताचेर कार्यशाळा घेतलें. सांजवेळा 6 वरांचेर कार्यावळीचें उक्तावण जातलें. उक्तावण सुवाळ्याक मुख्यमंत्री डॉ. प्रमोद सावंत हाजीर आसतले. ताचे उपरांत कार्लोस गोन्साल्वीस हांचे घुमट वादन सादरीकरण जातलें. ताचे उपरांत फोकर बँड (हंगेरी), फोककॉर्न (नेदरलँड) आनी हबीब खान (राजस्थान) हांची कार्यावळ जातली.
8 फेब्रुवारीक सकाळीं 10.30 ते सकाळीं 1 वरां मेरेन फोकर बँड आनी फोककॉर्न ह्या बँडांतले कलाकार कार्यशाळा घेतलें. सांजवेळा 6 वरांचेर सोनिया शिरसाट हांची कार्यावळ जातली. ताचे उपरांत अंब्रेला एनसेंबल (आयसलँड) आनी अल मोलर (स्वीडन) हांचे सादरीकरण जातलें. हाचे उपरांत कार्यावळीचो समारोप सुवाळो जातलो.
ही कार्यावळ सगळ्यां खातीर मुफत आसा. गोंयांतल्या संगीत मोगींनी ह्या कार्यावळीचो लाव घेवचो असो उलो मंत्री गावडे हांणी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
