भांगरभूंय | प्रतिनिधी
मडगांवच्यान दुर्भाटचे फेरी वेल्यान फोंड्यां वतना दुर्भाटा रावलो. रावपाकय कारण तशेंच आशिल्लें. थळावी नुस्तेंकान्न ताज्जी आनी बारीक सुंगटां घेवन दुर्भाट जेटीचे म्हऱ्यांत बशिल्ली, आनी ताका लागून घेवप्यांचें भिरें तिचे भोंवतणी पडिल्लें.
गरमेच्या दिसांनी, एप्रील, माय म्हयन्यांत जर्गतीक आमी जर्गतीची सुंगटां घेवपाक फांतोडेर दुर्भाटा पासय मारतात ताची म्हाका याद आशिल्ली.
दुर्भाटच्या जर्गतीच्या सुंगटाचें तोंडाक आनी कालवणां मुखार फायव्ह स्टार आनी सेचव्हन स्टार हॅटेलांच्यो रेसिपी तेल लायत गेल्यो….
आयतार फुलोवपाचे नदरेन हांवूय त्या भिऱ्यांत घुस्पलों. तिच्या पाट्यांत ताज्जी फडफडींत सुंगटां फडफडटालीं आनी एका प्लास्टिकाचे पोतयेंत मडकयच्यो तिसऱ्यो गिरायकाची वाट पळयताल्यो.
बारीक सुंगटा उजरावपाक कास्ताचें पाशियेंस जाय. पूण ताचें हुमण वा तोंडाक एकदम घोस्ताचें जाता. बाजरांत मेळटात ती सोलर सुंगटा उजरावपाक सामकी सोंपी. कारण सायजीन ती व्हड आसतात. पूण रुचीक एकदम बाबद. रब्बर चाबडायिल्ले भशेन चाबडावची पडटात.
‘दाने दानेपर लिखा है खानेवालेका नाम।’ निमाणो वाटो उरिल्लो आनी रेटीची घासाघीस करचे पयलींच सुंगटाचो वांटो केन्ना येवन म्हजे पोतयेंत येवन बसलो तें म्हाका कळ्ळेंच ना. शेवग्याच्यो सांगो, मुळो, गांवठी भेंडे, तन्नी तोरां नाजाल्यार रसरशीत बिमलां घालीत जाल्यार सुंगटाच्या कालवणाचो वास गांवभर फांकता.
…आनी इतल्यांत आमच्या भाटा सकयल आशिल्ले बिमलिणीक पाचवी धवशा कोरांची बिमलां घोंसांनी लागिल्ल्याची म्हाका याद जाली. घरा पावतकूच सुंगटाची पोती घरकान्नी कडेन सोंपयली. कपडे बदल्ले आनी आनी तडक्क शेताचे मेरे वेल्यान चलत बिमलिणीच्या मुळां म्हर्यांत गेलों.
बिमलिणीक घोंसांनी बिमलां लागिल्लीं आनी पिकिल्लीं बिमलां जमनीर गळून पडिल्लीं. लागींच आशिल्ल्या सायलाचे पसरट अशें पान काडून हाताक लागता तीं बिमलां काडलीं आनी पानांत गुठलायली.
पाचव्या धवशा कोरांचे बिमलांचे घोंस त्या पाचवेचार झाडार खुबूच सुंदर दिसताले. ‘जेथे सौंदर्याची प्रचिती तेथे कर माझे जुळती’. तो नजारो पळोवन हांव इतलो मंत्रमुग्ध जालो की विंगड विंगड अॅंगलांतल्यान हांवें कचाकच फोटो पेटयले…..
आनी तातूंतलोच एक फोटो तुमचे खातीर आनी गॅलरींत स्टोर करून दवरपा खातीर!
बिमलांक लागून बाकीबाबाली कविता याद जाली.
बिमलां घालून कर गो आयज सुंगटाचो रोस,
फैदासून हाडलां हांवें आयज ताजो घोंस…
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
