भांगरभूंय | प्रतिनिधी
बडतर्फीची मागणी करपी पत्र राज्यपालांक बरयतलों
पणजी: येरादारी तालांंवाचे रकमेंत अफरातफर करपी बायल पुलिशेचें निलंंबन न्हंय तर तिका बडतर्फ करपाची गरज आसा. पुलीस सेवेंतल्यान तिका बडतर्फ करपाची मागणी राज्यपालांंक पत्र बरोवन हांंव करतलों अशें काँग्रेसीचे आमदार अॅड. कार्लोस फेरेरा हांंणी सांंगलें. बायल पुलिशेन रकमेंत फेरफार करपाची घडणूक खूब दिसां पयलीं जाल्ली आसतना निलंंबनाक उशीर कित्याक जालो? पुलीस अधिक्षकान हाचेर स्पश्टीकरण दिवपाची मागणी अॅड. कार्लोस फेरेरा हांणी केली.
काँग्रेस हावजांत आमदार अॅड. कार्लोस फेरेरा हांंणी पत्रकार परिशद घेतली. ह्या वेळार प्रसारमाध्यम फांट्याचे अध्यक्ष अमरनाथ पणजीकार आनी उत्तर गोंंय जिल्हो काँग्रेस अध्यक्ष विरेंद्र शिरोडकार हाजीर आशिल्ले.
दिवचल पुलिशेंत बायल पुलिसा कडल्यान 17.30 लाखाची अफरातफर जावपाची घडणूक बरीच गंंभीर आसा. हे भानगडीची चर्चा बरोच तेप सुरू आशिल्ली. तरी लेगीत दिसाळ्यांनी खबरो छापून आयले उपरांंत चवकशी करपाचे आदेश पुलिसांंनी दिले. मदल्या काळात हे पयशें बँकेच्या खात्यांत भरून प्रकरण मिटोवपाचे यत्न जालें. अफरातफर करपाचो आरोप आशिल्ली बायल पुलीस ही सांखळी मतदारसंंघातली आसा. हें प्रकरण मिटोवपाचे येत्न कोणाचे मध्यस्थीन जालें? हो सगलो प्रकार दुबावीत आसा. पुलीस अधिक्षकांन पुराय भानगड स्पश्ट करून सगलो तपशील उक्तो करपाची गरज आसा. ही भानगड लिपोवपा सयत बायल पुलिशेक वाटावपाचे यत्न जाले काय? असो दुबाव आसा.
येरादारी तालांंवाचे पयशें बँकेत जमा करिनासताना ते हडप करपाचो प्रकार हो गंभीर स्वरुपाचो आसा. संबंंदीत बायल पुलिशेक बडतर्फ करपाची गरज आसा. घटनेच्या 311 (सी) कलमा खाला चवकशीचे आदेश दिवपाचे अधिकार राज्यपालांंक आसात. चवकशीचे आदेश दिवपाची मागणी करपी पत्र हांंव राज्यपाल पी. एस. श्रीधरन पिल्लई हांंकां बरयतलों, अशें अॅड. कार्लोस फेरेरा हांंणी सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
