भांगरभूंय | प्रतिनिधी
– एल्वीस गोम्सः सरकाराचो कनिश्ठ अधिकाऱ्यांचेर विस्वास ना
पणजीः सरकारी अधिकाऱ्याक दोन-तीन वर्सांची सेवेंत मुजतवाड दिवपाक सरकाराक कायद्यान कसलोच अधिकार ना. ते भायर केंद्र सरकारान सेवेंत मुजतवाड दिवची न्हय म्हूण स्पश्ट कायदो लेगीत केला. तरी लेगीत सरकार अधिकाऱ्यांक सेवेंत मुजतवाड दिवन कनिश्ठ अधिकाऱ्यांचेर विस्वास ना हें दाखोवन दिता, असो आरोप काँग्रेसीचे फुडारी आनी आदले आयएएस अधिकारी एल्वीस गोम्स हांणी केलो.
पणजे आझाद मैदानार सराकारी सेवेंत मुजतवाड दिवपाच्या प्रकाराचो समाज वावुरप्यांनी निशेध केलो. ह्या वेळार एल्वीस गोम्स उलयताले.
सरकाराक सेवेंत मुजतवाड दिवपाचो कसलोच नैतीक अधिकार ना. ते भायर कायद्यान हे विशींचे कसलेच हक्क दिल्ले नात अशें गोम्स हांणी सांगलें.
ह्याच डबल इंजीन सरकारान सेवेंत वाड दिवपा विशीं कायदेशीर निर्देश दिल्ले आनी वर्स 2022 सात केंद्र सरकारान ताची परतून याद करून दिल्ली. फक्त वैजकी मळार आनी वैज्ञानीक आसात तांकांच सेवेंत मुजतवाड मेळटा. तें लेगीत जेन्ना ताचे सकयलो मनीस अर्थसंकल्पाच्या कामांत गुथिल्लो आसता तेन्नाच फक्त तीन म्हयन्या मेरेन मुजतवाड दिवपाक मेळटा, अशें एल्वीस गोम्स हांणी स्पश्ट केलें.
संचालक पदाचेर मुजतवाड दिवपाची कसलीच तरतूद ना. ते भायर कायदेशीर सुचोवणी सांगता की जर परतून मुजतवाड दिली जाल्यार तांचे सकयले जे अधिकारी बडटी खातीर आसतात तांचो आत्मविस्वास कमी जाता आनी ते निरशेतात. देखून मुजतवाड ही दिवचीच न्हय. हें जर खरें नासत जाल्यार सरकाराच्या म्हायती खात्यान सांगचें की मुजतवाड खंयच्या कायद्यांत बसता, अशें आव्हान एल्वीस गोम्स हांणी केलें.
मुजतवाड मेळिल्ले अधिकारी हे म्हजे सहकारी. तांचे विशीं म्हजे वैयक्तीक कांयच ना. पूण तत्वांक पाळो दीत तांणी आपल्याक ही मुजतवाड नाका हें सरकारा सांगचें. तशें केलें ना जाल्यार हें स्पश्ट जातलें की तुमकां कसलें तरी मोटें कारस्थान करपाचें आसा, वा अशेंय सिध्द जातलें की सरकाराक तांचे सकयले अधिकारी आसात तांचेर अजिबात विस्वास ना. सराकाराचो आत्मविस्वास कमी जाला असो आरोप एल्वीस गोम्स हांणी केलाे.
जॉब स्कॅम लिपोवपा खातीर आनी पार्टी फंड जमा करपा खातीर सरकार मजुतवाड दीत आसा. जांणी जमीन विकपाचें काम सुरू केलां, ज्या मनशान म्हादय विकली तांकां सेवेंत मुजतवाड दिल्या, असो आरोप समाज वावुरपी रामा काणकोणकार हांणी केलाे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
