भांगरभूंय | प्रतिनिधी
वाळपय: सत्तरी म्हालांतल्या रानवटी जनावरांचो उपद्रव आजूनय सोंपूंक ना. सध्या शेकरू हो प्राणी नाल्ल उत्पादकांक त्रासाचो थारला. ही व्हडली चानी व्हडा प्रमाणात नाल्लाच्या उत्पादनाची वाट लायता. हाक लागून बागायतदार निरशेल्यात.
अडवयच्या युवराज देसाय हांचे बागायतींतलें नाल्लाचें उत्पादन रानवटी जनावरांनी उध्वस्त केलां. हाका लागून तांणी तिडक उक्तायल्या. सरकारान आतां तरी गंभीर जावन कितेंय उपाय काडचे अशी मागणी तांणी केल्या. ना जाल्यार येवपी काळांत सत्तरी म्हालांत नाल्लाचें उत्पादन नश्ट जावपाचो भंय देसाय हांणी उक्तायलो.
माकडां उपरांत आतां शेकरू
फाटल्या धा वर्सां सावन माकड व्हडा प्रमाणांत नाल्लाचें उत्पादन उध्वस्त करताले. नाल्ला वांगडा काजू ,आंबो, केळी हांचीय वाट लायताले. फाटल्या धा वर्सां सावन हातूंत बरीच वाड जाल्या. सरकारान रानवटी जनावरांक उपद्रवी म्हणून घोशीत करचें आनी तांचो बंदोबस्त करचो, अशी मागणी सेगीत जाता. मात हाचे कडेन कोणूच लक्ष दिनात. म्हणून हांगच्या शेतकारांक बरोच फटको बसता.
मजगतीं, रानवटी जनावरांचेर उपाय करचे. तांकां उपद्रवी प्राणी म्हूण घोशीत करचें. तांकां मारपाची परवानगी शेतकरी भावांक दिवची. बंदुकां खातीर परवाने दिवचे अशे तरेच्यो जायत्यो मागण्यो शेतकारांनी सरकारा कडेन केल्ल्यो. मात तांची अजूनय दखल घेवंक ना. हाका लागून सध्या सत्तरीचे बागायतदार बरेच बेजारल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
