भांगरभूंय | प्रतिनिधी
मडगांव : भुरग्यांक खाणांचें, गिफ्टांचें हांयस दाखोवन तांचेर लैंगीक अत्याचार करपी पॉल फोन्सेका (रा. थिवी) हाका कोंकण रेल्वे पुलिसांनी ताब्यांत घेतलो. दुबाविताचे तावडेंतल्यान ११ वर्सां पिरायेच्या चल्याचीय सुटका केली.
मंगळारा मध्यानरातीं सुमार ३ वरांचेर मेळिल्ले म्हायती प्रमाण पुलीस थिये रेल्वे स्टेशनाचेर पावले. तांणी लैंगीक शोशणाचो बळी पडिल्ल्या एका ११ वर्सां पिरायेच्या चल्याची सुटका केली आनी अत्याचार करपी पॉल फोन्सेकाक ताब्यांत घेतलो.
चवकशे मजगतीं फोन्सेका हो उपेक्षित वर्गांतल्या ल्हान भुरग्यांक आपल्या जाळांत घुस्पायतालो. भुरग्यांक भेटवस्त, गाडयेन भोंवडावपाचें हांयस दाखोवन लागीं करतालो. सुटका केल्ल्या चल्यान बायलांचो एकवोट संस्थेच्या समुपदेशकाक दिल्ले म्हायती प्रमाण, त्या पिडेस्ताच्या ल्हान भावाचेरुय दुबावितान लैंगीक अत्याचार केला. हेरूय जायत्या भुरग्यांक दुबावीत हांयस दाखोवन घरा व्हरतालो. तांकां मादक द्रव्यां पिवपाक दितालो. तांकां बळयां अश्लील व्हिडियो पळोवपाक लायतालो आनी अत्याचार करतालो. उपरांत तांकां धमकायतालो. खंयच्याय चल्यान जर हें सगळें करपाक न्हयकार दिल्यर वा घरा पावोवपाचो हट्ट केल्यार तांकां मारतालो अशेंय पिडेस्तान सांगलें. हे विशीं कोंकण रेल्वे पुलिसांनी दुबाविताक ताब्यांत घेतला आनी फुडले तपासणे खातीर कोलवाळ पुलिसांचे सुवादीन केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
