भांगरभूंय | प्रतिनिधी
दिवचल : दिवचले पुलीस स्टेशनांत कामाक आशिल्ली बायल पुलीस कॉन्स्टेबल पूजा गांवस हिका येरादारी चलनाचे रकमेंत वट्ट १७.३० लाखांची अफरातफर केल्ल्याच्या आरोपा वयल्यान निलंबीत केल्या. गोंय पुलिसांनी हे विशीं आदेश जारी केला.
पुलिसांनी दिल्ले म्हायती प्रमाण, डिसेंबर २०२३ ते ऑक्टोबर २०२४ मजगतीं हो प्रकार घडलो. दिवचल पुलिसांनी ह्या काळांत दिवचलच्या विवीध सुवातींचेर शेकड्यांनी लोकांक येरादारी नेम पाळूंक नाशिल्ल्यान तालांव घाल्लो. जारी केल्ल्या चलनांची म्हायती संबंदीत पुलिसां कडल्यान आल्तिनोच्या येरादारी पुलीस मुख्यालयांत पावयताले. उपरांत रक्कम पुलीस स्टेशनांतले बायल कॉन्स्टेबला कडेन दिताले. ती मागीर रक्कम बँकेंत भरताली. मजगतीं हे बायल कॉन्स्टेबलान रकमेंतली अर्दीच बँकेंत भरली. पुलीस मुख्यालयान जेन्ना दिवचल पुलीस स्टेशनांतले तालांव आनी जमा जाल्ले रक्कमेचो हिशोब केलो तेन्ना हातूंत बरोच फरक आशिल्ल्याचें दिसलें. उपरांत ह्या वेव्हारांत कोणाचो हात आसा, हाची चवकशी जाली. चवकशे वेळार हे बायल कॉन्स्टेबलान आपलो गुन्यांव मान्य केलो. तशेंच सगळी रक्कम परत दितली, अशीय हमी तिणें दिली. कांय रक्कम भरल्या, अशेंय कळटा. मजगतीं, हें प्रकरण ‘द गोवन’ दिसाळ्यांत दोन दिसां पयलीं उजवाडाक येतकच खात्यांत बरोच बोवाळ जालो. आतां संबंदीत बायल कॉन्स्टेबलाक निलंबीत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
