भांगरभूंय | प्रतिनिधी
प्रमोदबाब,
३८ व्या राजभास दिसा निमतान तुमीं केल्ल्या भाशणांतल्यान तुमच्या आंगांत मायभास कोंकणी भरसल्ली दिसली. दिल्ली ते गल्ली मेरेन भोंवतना तुमकां गोंयकार मेळटकच तें कोंकणी उलयतात आनी आपसूक तुमीय कोंकणी उलोवंक लागतात हें तुमकां कळ्ळां हाची गवाय मेळ्ळी. भाशणांत कोंकणी भाशे विशींची तळमळ दिसली. तुमी देव बरें करुं म्हणलें तेन्ना आमीय सगल्यांनी तुमकांय देव बरें करुं म्हणलें.
राजभास दिसाचो सुवाळो सोंपून वतना आडावन तुमच्या हातांत ‘यादींचो कुरपणो’ हें साहित्यिक, आदले आमदार अॅड. उदय भेंब्रे हांणी बरयिल्लें पुस्तक दिलें. ओपिनियन पोल, राजभास कोंकणी, गोंय राज्य दिसाचे एक व्हड साक्षीदार उदयबाब म्हजे गुरु. राजभास दीस सुवाळ्याच्या दोन दिसां पयलीं मोबायलार उलयतना तांणी सांगलें, दिवचले एके कार्यावळींत मुख्यमंत्री प्रमोद सावंत बरी कोंकणी उलयतना हांवें आयकलां. उदयबाब, ‘यादींचो कुरपणो’ पुस्तक मुख्यमंत्र्यां कडेन पावयलां? म्हजो प्रस्न? ना. तांची जाप. हांव दिवं राजभास दिसाच्या सुवाळ्याक वतलें तेन्ना? म्हजो प्रस्न.
पुस्तक जाय जाल्यार धाडटां, तूं दिवशीत? उदयबाबान विचाल्लें.
हय, तुमीं पुस्तक धाडपाची गरज ना, म्हजे कडेन दोन प्रती आसात, ही म्हजी जाप. उदयबाब, आयताराचो लेख वाचलो? राजभास कोंकणीची न्हंय जाल्या तो? उदयबाबान जाप दिली, हांव नेमान वाचतां.
निश्चेवान ३८ व्या राजभास दीस सुवाळ्याक गेलें. पर्सींत उदयबाबांचें ‘यादीचो कुरपणो’ पुस्तक. पुस्तक मुख्यमंत्र्यां कडेन ज्ञानपीठकार दामोदर (भाई) मावजो हाणीं दिवचें म्हणून तांकां सोदलें. ते दिसलें नात, कोंकणीच्यो सेवाव्रती आदल्यो आमदार निर्मला सावंत मेळ्ळ्यो. यादींचो कुरपणो पुस्तकाची ताणीं याद काडली. राजभास दिसाचो सुवाळो सोंपून परततना पुस्तक मुख्यमंत्र्यां कडेन पावलें ही खोस म्हाका आशिल्ली, मुख्यमंत्री खोशी दिसले पुस्तक मेळ्ळां म्हणून. पुस्तक बेगीन वाचतले अशें उतर ताणीं दिलां.
सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
