भांगरभूंय | प्रतिनिधी
जानेवारी सोपून फेब्रुवारी येता म्हणल्यार सगल्यांचे लक्ष बजेटाचेर लागता. वित्त मंत्री आपले पोतयेंतल्यान कितें काडून आमचे मुखार दवरता हाची सगल्यांक उमळशीक लागिल्ली आसता. सरकार निमाणें खंयच्यान दितलो? आमच्याच बोल्सांतलें काडून आमकां दितलो हें जरी खरें आसलें तरी लोकांचे दोळे बजेटा कडेन लागिल्ले आसतात. बजेट जालें म्हणून जिडिपी वाडटलो अशें ना. जिडिपी वाडपाचीं कारणां वेगळींच आसतात. कोणतरी गाडो चलयता, कोण दुकान घालता, कोण गिरण चलयता, कोण नुस्तें विकता, ल्हान ल्हान जायना कसलो तरी उद्देग करता. पयशांची उलाढाल करता. आपले वांगडाच एक दोगांचो संवसार चलयता. जिडिपी वाडपाचें कारण हेंच. ल्हान ल्हान उद्देग करुनूच मनीस व्हडलो जाता. एकेच रातीन कोण टाटा, बिर्ला जायना. ताका वर्सां वचचीं पडटात.
म्हाका कोणाकूय एक उदाहरण दिवचें दिसता. बिजापूरचो एक मनीस हमाली करपाक मडगांवां येता. हमाली करतां करतां ताच्या मनांत आपणें उद्देग करचो अशें येता. तो गांधी मार्केटांत एक दुकान भाड्यान घेता आनी थंय रेडिमेड कपड्यांचें दुकान घालता. दुकानार बायलेक बसयता. मजतीक आनीक एक बायल दवरता आनी धंदो सुरू करता. तो हमाली सोडिना, दुकानाचो जम बससर ताका काम करुंकूच जाय. अदींमदीं तांकां कितें जाय नाका तें पळोवंक दुकानार वता. आतां पळयात, दुकानाचें भाडें, मदतनिसाचो पगार म्हणजेच दोन घरां तो चलयता. स्वताकूय कितेंतरी दवरतलोच न्ही. ते भायर सामान विकतें घेता. ताका सामान दिवपीय जोडटा. जिडिपी वाडटा तो असो. बजेट केलें आनी स्टार्ट अपची घोशणा दिली म्हणून जिडिपी वाडना. तरी आसतना बजेटाची भोगावळ करुंकूच जाय.
तर बजेटाचो दीस उजवाडलो. वित्त मंत्री उलोवंक उबी रावली आनी घे बोवाळ. कांयच आयकूंक येना. अखिलेश यादव आनी सांगाती बोवाळ घालीत आसले. सद्याक एक वायट प्रथा आमकां पळोवंक मेळटा. विरोधी पक्षाक कळ्ळां विरोध करून कांयच जावपाचें ना. सरकार आपणाक जाय तेंच करतलें. म्हणटकूच विरोधक बोवाळ घालून कशें तरी काम बंद उडोवंक सोदता. लोकांच्या पयशांचो धूप जाल्यार जाता. तांचीं पोटां आपसूक भरतात न्ही. संसदेचें काम बंद पडलें म्हणून तांकां खंय लुकसाण जाता तर? तांच्या बोल्सांतले दुडू थोडेच वतले. विरोध करूंक जायते मार्ग आसात पूण तांकां त्या मार्गान वचपाचें ना. तांकां बोवाळ घालून काम बंद उडोवचें आसता. हेर दिसांनी बरें आसा पूण बजेटाची भोगावळ सोंपसर तरी थार धरात न्ही. वित्त मंत्र्याचें उलोवप सोंपतकूच जाय तितलो बोवाळ घालात. कोण कांय म्हणचो ना. आरे बाबांनो लोक तुमकां लायव्ह पळेतात, तुमकां जोखतात हाचें तरी भान दवरात. तशें लोकांकूय कळूंक बरें आमी कसले लोक थंय धाडटात तें.
त्या बोवाळांतूय वित्त मंत्री उलोवंक लागली. एक एक नग लोकां मुखार दवरूंक लागली. शेतकारांक हें, बायलांक हें, तरणाट्यांक हें, ल्हान उद्देगांक हें. कांय खीण हें खरेंच काय सपन बी कांयच कळना जालें. कोणे अपेक्षाच करूंक नाशिल्ली तरी लेगीत वित्त मंत्री तें दिताली. खऱ्यांनीच लक्ष्मी प्रसन्न जाली काय हो प्रस्न मुखार उबो रावचो. इतलो वेळ चलपी बोवाळ लेगीत थांबिल्लो. घडये विरोधकूच अजापिल्ले जावंक जाय. इतल्यान वित्त मंत्र्यान घोशणा केली, बारा लाख मेरेन जोड आशिल्ल्यांक आयकर भरचो पडचो ना. हें आयकून कोणूय बेशुद्ध पडपाचोच. जंय हातार पंचखाद्य पडपाची थंय एकदम दोणो? हय, वित्त मंत्र्यान सरळ दोणोच दिल्लो. पूण तिणें मुखार म्हणलें, नवे प्रणाली प्रमाण आतां कराची रचना अशी आसतली. वयर तेंगशेर पावूंक आयलां आनी अकस्मात निसरून सकयल पावचें अशेंशें जालें.
फक्त चार लाख मेरन उत्पन्नाचेर शुन्य टक्के कर. ताचे उपरांत पांच, धा, पंदरा, वीस प्रतिशें टॅक्स आसाच. जाचें उत्पन्न बारा लाख ताका साठ हजार टॅक्स पडटा. फक्त सरकार ताका साठ हजारांची सूट दिता. हाचोच अर्थ उत्पन्न बारा लाखांच्या मात्शें वयर पावत जाल्यार ताका संपूर्ण टॅक्स भरचोच पडटलो. देखीक उत्पन्न बारा लाख धा हजार जालें जाल्यार एकावन हजार पाचशें रुपया आनी बारा लाख सत्तर हजार उत्पन्न जालें जाल्यार सत्तर हजार टॅक्स भरचो पडटलो. एके तरेन धा ते सत्तर हजार चड जोडिल्ल्याचेर हो अन्यायूच म्हणचो पडटलो. वित्त मंत्री जेन्ना बारा लाखां मेरेन उत्पन्नाचेर टॅक्स आसचो ना म्हणटात तेन्ना खरें म्हणल्यार शुन्य ते बारा लाख मेरेनच्या उत्पन्नाचेर टॅक्स शुन्य आसूंक जाय आसलो. आनी ताचे वयर बारा ते सोळा, सोळा ते वीस ह्या स्लॅबांचेर पांच, धा, पंदरा टक्के टॅक्स लावंक जाय आसलो. तशें केल्लें तरूच वित्त मंत्री तोखणायेक पात्र थारपाच्यो. सद्याचे म्हारगायेंत इतली सवलत दिवप योग्य थारपाचें. एकेवटेन आठ लाख मेरेन उत्पन्न आशिल्ल्यांक सरकार अर्थीक नदरेन दुबळो म्हणटा आनी दुबळ्याचेर कर लायता हें कितलें सारकें?
बरें इतल्यान सोंपलां? ना! कांय दिसांनी नवें आयकर बील येवचें आसा. तातूंत आनीक कितें शिजोवन दवरलां देवाक खबर. वित्त मंत्र्यान ज्यो घोशणा केल्यात त्यो लोकांक पिशे करूंक काय दिसता. आज पांच तारखेक दिल्लींत वेंचणूक जावपाची आसा. थंयच्या मतदारांक भुलोवपाक हो सगलो उपदव्याप काय दिसता. बजेट जर खऱ्यांनीच बरें आशिल्लें जाल्यार त्या दिसा आनी उपरांतूय शेर मार्केट नाच करचे नासले. तें स्थीर रावन बजेटाक येवकार दिवपाचें. पूण अशें जाल्लें दिसना. आतां वाट पळोवपाची दिल्ली वेंचणुकेची आनी उपरांत येवपी आयकर बिलाची. मागिरूच कळपाचें लक्ष्मी कोणाचेर कितली प्रसन्न जाल्या ती.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
