भांगरभूंय | प्रतिनिधी
लक्ष्मीकांत पार्सेकार: भाजप प्रवेशा विशीं दिले सुचक संकेत
पणजी: हांव दुसऱ्याल्या घरांत गेलो ना. शिंगां आटपलीं म्हूण भायर रावलों अशें आदले मुख्यमंत्री लक्ष्मीकांत पार्सेकार हांणी मंगळारा पत्रकारां कडेन उलयतना सांगलें. पूण, भाजपांत परतून प्रवेश करपा विशींच्या प्रस्नाक जाप दितना ‘काळूच कितें तें थारायतलो’ अशें सांगून मुखार उलोवपाचें टाळ्ळें.
मुख्यमंत्री आसतनाय 2017 चे विधानसभा वेंचणुकेंत लक्ष्मीकांत पार्सेकार हांकां हार खावची पडिल्ली. उपरांत 2022 चे वेंचणुकेंत उमेदवारी न्हयकारले उपरांत तांणी भाजपाक सोडचीट दिवन मांद्रें मतदासंघांतल्यान अपक्ष म्हूण वेंचणूक लडयिल्ली. पूण थंय लेगीत तांकां हार घेवची पडली. उपरांतच्या काळांत पार्सेकार पक्षा पसून कायमचे पयस गेले.
दामू नायक हांची भाजप प्रदेशाध्यक्षपदार नेमणूक जाले उपरांत तांणी भाजप कचेरेंत वचून तांणी नायक हांचें अभिनंदन केलें. तेन्ना सावन पार्सेकार परतून भाजपांत परततले काय कितें हे विशींचे चर्चेक नेट धरला. मंगळारा हे विशीं पत्रकारांनी तांकां विचारलें तेन्ना तें काळूच थारायतलो अशें सांगून ताचेर चड उलोवपाचें टाळ्ळें.
दामू नायक म्हजे सामकें लागींचे इश्ट आसात. आमी दोगांनी एकठांय पक्षाचें काम केलां. तांची प्रदेशाध्यक्षपदार निवड जाले उपरांत म्हाका खोस जाली. ताका लागूनच आपूण तांचे अभिनंदन करपा खातीर गेल्लों अशेंय पार्सेकार हांणी मुखार उलयतना सांगलें.
निसुवार्थीपणान येतात तांकां येवकार
लक्ष्मीकांत पार्सेकार हांकां परतून पक्षांत घेवपा विशीं प्रदेशाध्यक्ष दामू नायक हांकां विचारलें तेन्ना, खंयच्याय पदाची अपेक्षा करिनासतना पक्षांत येवन काम करप्यांक सदांच येवकार आसतलो अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
