भांगरभूंय | प्रतिनिधी
नवी दिल्ली, खबरां संस्था ः कोवीड-19 उपरांतच्या काळांत अमेरिकन तरणाट्यां मदीं मरण येवपाचें प्रमाण अपेक्षा परस चड आसा अशें एका अभ्यासांतल्यान दिसून आयलां. ‘जर्नल ऑफ द अमेरिकन मेडिकल असोसिएशनने (जेएएमए) नेटवर्क ओपन’त हें संबंदीचो अहवाल उजवाडाक आयला. संशोधकांनी 1999 ते 2023 ह्या काळांत मरण आयिल्ल्या 25 ते 44 वर्सां पिरायेच्या 33 लाख लोकांक मरण आयिल्ल्याचें विश्लेशण करून हो निश्कर्श काडलो.
तरणाट्यांचें मरण प्रमाण वाडलां, पूण तांच्या मरणाचीं कारणां एकामेकांपरस खूब वेगळीं आसात. हातूंत ड्रग्स आनी सोऱ्याक लागून जावपी मरणां, काळजाचे दुयेंस, गोडेंमूत, रगतांतली साकर चड, स्ट्रोक, उच्च रगतदाब, मोटसाण, तशेंच अपघाती मरणां वाडप हांचो आस्पाव आसा. देखून कोरोना महामारीच्या सध्याच्या परिणामांचेर चड संशोधन करपाची गरज आसा अशें संशोधकांनी सांगलां.
अमेरिकेंतल्या ‘युनिव्हर्सिटी ऑफ मिनेसोटा’च्या संशोधकांनी ह्या अभ्यासांत वांटो घेतिल्लो. कोरोना महामारीच्या काळांत तरणाट्यां मदीं मरण येवपाचें प्रमाण खूब वाडलें आनी महामारी उपरांत लेगीत अपेक्षा परस चड उरलां अशें संशोधकांनी ह्या अभ्यासांत सोदून काडलां. हाचो लोकसंख्येचेर परिणाम जावपाची शक्यताय आसा अशें संशोधकांनी नदरेक हाडलां.
अमेरिकेंत 2010 च्या सुमाराक तरणाट्यांक मरण येवपाचें प्रमाण उणे जातालें पूण कोरोना उपरांत तें प्रमाण वाडलें. महामारी पयलींच्या दशकाची तुळा केल्यार 2023 वर्सा 25 ते 44 वर्सां पिरायेच्या तरणाट्यां मदीं मरण येवपाचो आंकडो तब्बल 70 टक्क्यांनी वाडला अशें संशोधनांत म्हणलां. 2023 वर्साची आंकडेवारी 2010 वर्सांचे आंकडेवारी परस 20 टक्क्यांनी चड आसा.
मजगतीं, भारतांतय फाटल्या कांय वर्सांत तरणाट्यां मदीं अचकीत मरण येवपाचें प्रमाण वाडलां. जिमांत व्यायाम करतना वा खेळटाना काळजाचो आताक येवन मरपी तरणाट्यांचो आंकडो वाडत आसा. तातूंत भलायकेन बऱ्या आनी फिट तरणाट्यांचो आस्पाव आशिल्ल्याचें दिसता, ताका लागून हुस्को निर्माण जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
