भांगरभूंय | प्रतिनिधी
पालिका मंडळांतल्या सत्ताधारी गटा सयत कर्मचारीय बंडाचे तयारेंत
भांगरभूंय । प्रतिनिधी
म्हापशें: म्हापशें पालिका मंडळांतलो सत्ताधारी गट आनी पालिका कर्मचाऱ्यांनी नगराध्यक्ष शुभांगी वायंगणकार हांचे आड बंडाची तयारी केल्या. तांकां नगराध्यक्षपदा वयल्यान देंवोवचे खातीर रणनिती आंखपाक सुरवात केल्या.
म्हापश्यां नव्या कदंबा बसस्टॅण्डा कुशीक हालींच बेकायदो गाडो उबारिल्लो. तो गाडो भाजपा पक्ष विरोधकाचो आशिल्लो. ह्या गाड्याक नगराध्यक्षाचो कृपा आशिर्वाद आशिल्ल्याचो प्रकार उजवाडाक येताच पालिका मंडळांतल्या सत्ताधारी गटांत नाराजी पातळ्ळी. अखेर ह्या गटाच्या चेपणा उपरांत पालिका कर्मचाऱ्यांनी तो गाडो काडलो.
तशेंच नगराध्यक्ष सत्ताधारी गटाक कुशीक दवरून विरोधी गटांतल्या कांय नगरसेवकांची मर्जी सांबाळटा. ह्या प्रकाराक लागून लेगीत सत्ताधारी गटांत धुसफूस चालू आसा. हे आदीं नगराध्यक्षाचे कार्यपद्दतीचेर सत्ताधारी गट बेजार आशिल्लो, पूण तांचो बंड येसस्वी जावचे आदींच पक्ष फुडाऱ्यांनी ताचेर उपाय काडिल्लो. मात विरोधकांक गाडो उबारपाक मजत केल्ल्याचें हें प्रकरण भाजपा फुडाऱ्यां मेरेन पावलां. ताका लागून पालिका सत्ताधारी गटांत फुडारपण बदलचे खातीर हालचाली सुरू जाल्यात.
मजगतीं, नगराध्यक्षाचे कार्यपद्दतीचेर पालिका कर्मचारी वर्ग खोशी ना. निरिक्षकांवरीं नगराध्यक्षान कर्मचाऱ्यांचेर देखरेख दवरपाक सुरवात केल्या. तांचे हाजेरी वही तपासप पोरूंच्यान चालू आसा.
हे सतावणुकेक कर्मचारी बेजारल्यात. पालिका कर्मचारी संघटणेचेर कामगारांनी चेपण हाडपाक सुरवात केल्या. पालिका मंडळान नगराध्यक्षाक पदा वयल्यान देंवोवचो ना जाल्यार बेमुजत संपाचेर वचपाचो निर्णय घेवपा मेरेन कर्मचारी पावल्यात.
पालिका मंडळांतल्या सत्ताधारी गटाच्या हातांत कर्मचाऱ्यांचे वयले भुमिकेचें शस्त्रूय मेळ्ळां. ताका लागून नगराध्यक्ष शुभांगी वायंगणकार हांकां काडपाचे हालचालींक सध्या गती आयल्या.
विधानसभा अधिवेशन सोंपले उपरांत फुडारवण बदलपाची मागणी पक्ष फुडाऱ्यां कडेन करपाचो निर्णय लेगीत ह्या गटान घेतला, अशी म्हायती सुत्रां कडल्यान मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
