भांगरभूंय | प्रतिनिधी
पणजी : हरीत ऊर्जा निर्मिती खातीर राज्यांत आनीक यत्न जावप गरजेचें, अशें मत वीज मंत्री सुदीन ढवळीकार हांणी उक्तायलें. सोमारा खात्या वतीन आयोजीत पीएम सूर्यघर येवजण प्रशिक्षण कार्यशाळेच्या उकतावणा वेळार ते उलयताले. ह्या वेळार मुखेल अभियंते स्टीफन फर्नांडीस, अधीक्षक अभियंतो मयूर हेदे, राष्ट्रीय विद्युत प्रशिक्षण संस्थेची संचालिका डॉ. त्रिपुरा ठाकूर, संजय पाटील आनी हेर मानेस्त हजर आशिल्ले.
प्रशिक्षण कार्यशाळा आयोजीत
राज्यांत वीज खात्या वतीन पीएम सूर्य घर फुकट वीज येवजणे खाला आतां मेरेन १० मेगावॅट वीज निर्मिती करप अपेक्षीत आशिल्लें. मात सध्या फकत १ मेगावॅट वीज तयार जाता. ही प्रक्रिया वेगान जावप गरजेची. हाचे खातीर खात्याच्या कर्मचार्यांनी येवजणेचे अर्ज सात दिसांनी निकालांत हाडपा खातीर यत्न करपाक जाय. वीज अभियंत्यांक हे येवजणेची खोलायेन म्हायती मेळचे खातीर ही प्रशिक्षण कार्यशाळा आयोजीत केल्या अशें मंत्री ढवळीकार हांणी सांगलें.
गेडा कडेन ३५०० अर्ज
सध्या गेडा कडेन हे येवजणे खातीर ३५०० अर्ज आसात. हांची तपासणी केले उपरांत आमचे अभियंते ताची पळोवणी करतले. पळोवणी केले उपरांत ही येवजण कशी चालीक लावची, सुरक्षा मानांकन, प्रशासकीय गजाली हेरांची म्हायतीय हे कार्यशाळेंत दितले. उपरांत आमचे अभियंते सूर्य घर तशेंच केंद्र आनी राज्य सरकाराच्या हेर येवजण्यां विशीं गांवांगांवांनी वचून म्हायती दितले. एप्रील म्हयन्या उपरांत ह्या आनी हेर विशयांचेर आनीक एक कार्यशाळा घेतले, अणेंय तांणी मुखार म्हणलें.
श्री. ढवळीकार हांणी सांगले, केंद्राचे हेर एके येवजणे प्रमाण सौर ऊर्जा निर्मिती खातीर ५० टक्के अनुदान दितात. पीएम सूर्य घर येवजण ही राज्य सरकारा वतीन दितात. खंयच्याय मनशान अर्ज केले उपरांत ताच्या घराचेर सौर ऊर्जा पॅनल बांदप शक्य आसा काय, ते बांदले उपरांत ताका स्थिरताय मेळटली काय, वीज निर्मिती कितली जातली, तयार जाल्ली वीज त्या घरांतलो लोड घेवपाक शकता काय? ह्या सगल्याची म्हायती घेतले उपरांतूच येवजणेचो लाव दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
