भांगरभूंय | प्रतिनिधी
नवी दिल्ली, खबरां संस्था: इंडियन स्पेस रिसर्च ऑर्गनायझेशन अर्थात इस्रोन हालींच आपल्या १०० व्या रॉकेट मिशनाची सुरवात केल्ली. ह्या मिशनाची सगळ्यांनी बरीच तोखणाय केल्ली. मात आतां ह्याच मिशना विशीं एक वायट बातमी येता. त्या रॉकेट मिशनांत कांय तांत्रीक आडखळी येतात. बुधवारा प्रक्षेपीत केल्लो नेव्हिगेशन उपग्रह NVS-02 त तांत्रीक इबाड जाल्ल्यान ताचे अभिप्रेत कक्षेंत पावूंक शकलो ना. हे विशीं वेबसायटीचेर अपडेट दितना इस्रोन सांगलें, ‘उपग्रह नेमून दिल्ले सुवातेर व्हरपाचे प्रक्रियेंत आडखळ आयली.’
कितें समस्या येतात?
कक्षा वाडोवपा खातीर, उपग्रहांच्या इंजिनाक ऑक्सिडायझर पुरोवपी व्हॉल्व्ह उघडप शक्य जावंक ना, हाका लागून ताची उंचाय वाडली आनी फुडलें काम करपाक आडखळी निर्माण जाल्यो. हो उपग्रह यू आर राव उपग्रह केंद्रान तयार केल्लो आनी तो जियोस्टेशनरी कुडींत दवरपाचे आशिल्ले. मात, ताच्याा लिक्विड फ्युएल इंजिनांत इबाड जाल्ल्यान ताका आतां नेमिल्ल्या कक्षेंत धाडपाक आडमेळीं येतात.
वर्साचें पयलें मिशन
बुधवारा सकाळीं सुमार ६.२३ वरांचेर इस्रोन आंध्र प्रदेशांतल्या श्रीहरिकोटाच्यान जीएसएलव्ही- 15 रॉकेटा वरवीं एव्हीएस-02 चें येसस्वी प्रक्षेपण केलें. इस्रोचे नवे अध्यक्ष व्ही नारायणन हांचे खातीर हें मिशन म्हत्वाचें आशिल्लें. कारण तांच्या नेतृत्वा खाला हें पयलें प्रक्षेपण आशिल्लें. तशेंच इस्रोचें अंदूंचें हें पयलेंच मिशन आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
