सुखकर्ता दुखहर्ता, कांपाल बालगणेश
भांगरभूंय | प्रतिनिधी
आयज माघी गणेश जयंती. माघ शुक्ल चवथ. गोंयांत गणपतीचीं साबार देवळां आसात. पणजेंतली कांपाल वाठारांतली बालगणेशाची देवळी ही फकत पणजेकारुच न्हय जाल्यार भारतीय, विदेसी नागरिकांकूय आपोवन व्हरपी.
माघी गणेश जयंतीदिसा हे देवळेंतल्या गणपतीची स्थापना जाली. आयज हो गणेश सगल्यांचो जाला, सगल्या धर्मांचो आनी जातीचो. गरीब आनी गिरेस्तांचोय. कांपाल बालभवना लागीं आशिल्ल्यान हे देवळेंतलो गणपती बालगणेश जाला आसूंये.
जेन्ना ह्या बालगणेशाचे देवळेभायर समेस्त एकठांय जावन ‘सुखकर्ता दुखहर्ता’ आरती म्हण्टात तेन्ना बशींत आशिल्ले, गाडयेतलें, चलपी मनीस त्या वातावरणात भरसून वतात. हे देवळेंतली गणपतीची मूर्ती सूर्यकिर्णांत लिकलिकता तेन्ना ते मूर्तींतलें अध्यात्म दिसता. पाषाणी काळी सुंदर गणेशमूर्ती फुलांनी, भांगरांनी, वस्त्रांनी आयज सजयिल्ली दिसतली, विनायकी, संकश्टी, दर मंगळारा थंय भक्तांचो हुंवार येता.
गणेशजयंती हो कांपाला वयल्या बालगणेशाचो स्थापना दीस जाल्ल्यान फांतोडेर सावन आरती, सत्यविनायक, म्हाभिषेक, म्हाप्रसाद, भजन ही कार्यावळ अंदूय आसा. चलात दर्शन घेवया कांपाल बालगणेशाचें. वर्सा भितर कांपाल परेड ग्रावंडार कांपाल बालगणेश मंदीर दिसतलें.
- सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
