भांगरभूंय | प्रतिनिधी
2018 वर्सा काणकोण म्हालांत घडिल्लो प्रकार
पणजी: काणकोण म्हालांत 2018 वर्सा एका इमारतीचें बांदकाम सुरू आशिल्ल्या वाठारांत मिठाय दिवपाचें हांयस दाखोवन एका 6 वर्सा पिरायेचे चलयेचेर लैंगीक अत्याचार केल्लो. ह्या प्रकरणांत बाल न्यायालयान आरोपी जयदीप रई आनी रवी रई ह्या दोगांक 20 वर्सां खर बंदखण आनी 7.5 लाख रुपयांचो दंड, जाल्यार तिसरो आरोपी मनोज कुमार हाका 20 वर्सां बंदखण आनी 7 लाख रुपयांचो दंड अशी ख्यास्त दिली. हे विशींचो निवाडो बाल न्यायालयाचे अध्यक्ष सई प्रभुदेसाय हांणी दिलो.
ह्या प्रकरणाचो काणकोण पुलिसांनी 28 एप्रील 2018 दिसा गुन्यांव दाखल केल्लो. ते प्रमाण 6 वर्सा पिरायेच्या पिडीत चलयेच्या सोयऱ्यांनी कागाळ दाखल केल्ली. तातूंत पिडीत चलयेक एका इमारतीचें बांदकाम सुरू आशिल्ल्या वाठारांत मिठाय दिवपाचें हांयस दाखोवन तिचेर लैंगीक अत्याचार केल्ल्याचें म्हणिल्लें.
हाची दखल घेवन तेन्नाचे पुलीस निरिक्षक राजेंद्र प्रभुदेसाय हांच्या मार्गदर्शना खाला उपनिरिक्षक प्रशल नायक देसाय हांणी भारतीय दंड संहितेच्या कलम 376, 377, 354, 365 आनी गोंय बाल कायद्याचें कलम 4 आनी 8 खाला गुन्यांव दाखल केल्लो.
उपरांत पुलिसांनी आरोपी जयदीप रई, रवी रई आनी मनोज कुमार ह्या तिगांक अटक केल्ली. उपनिरिक्षक प्रशल नायक देसाय हांणी तपास पुराय करून वयल्या तिगां आरोपीं आड 18 जून 2018 दिसा बाल न्यायालयांत आरोपपत्र दाखल केलें. ह्या प्रकरणाची न्यायालयान प्रथमदर्शनी पुराव्याची दखल घेवन तिगां आरोपीं आड 27 जुलय 2018 दिसा आरोप निश्चीत करून खटलो सुरू केलो. बाल न्यायालयांत सरकारी वकील अॅना मेडोंसा, मिलैना पिंटो आनी थेमा नार्वेंकर हांणी युक्तिवाद करून आरोपी आडचे पुरावे सिद्ध केले.
6 वर्सा पिराय आशिल्ल्या पिडीत चलयेची साक्ष ह्या निकालांत म्हत्वाची थारली. साक्षिदारांची साक्ष आनी वैजकी अहवाल सकारात्मक आयिल्ल्याचो दावो करून आरोपींक खर ख्यास्त दिवपाची मागणी केल्ली.
बाल न्यायालयान पुराव्यांची दखल घेवन आरोपींक दोशी थारायलें. तातूंत आरोपी जयदीप रई आनी रवी रई ह्या दोगांक भादंसंच्या कलम 365 खाला चलयेचें अपहरण केल्ल्या प्रकरणांत सात वर्सांची खर बंदखण आनी 50 हजार रुपयांचो दंड. जाल्यार लैंगीक अत्याचार केल्ल्या प्रकरणांत आरोपी जयदीप, रवी आनी मनोज कुमार ह्या तिगांक भादंसंच्या कलम 376(2) खाला 20 वर्सांची खर बंदखण आनी 3 लाख रुपया दंड, आनी दंड भरलो ना जाल्यार पांच वर्सांची सादी बंदखण अशी ख्यास्त दिली.
गोंय बाल कायद्याचें कलम 8(2) खाला 20 वर्सांची खर बंदखण आनी 2 लाख रुपया दंड. दंड भरलो ना जाल्यार दोन वर्सांची सादी बंदखण आनी बाल लैंगीक शोशण विरोधी कायद्याचें कलम 6 खाला 20 वर्सांची खर बंदखण आनी 2 लाख रुपया दंड. दंड भरलो ना जाल्यार दोन वर्सांची सादी बंदखण. वयली ख्यास्त आरोपींनी एकठांय भोगपाच्यो आसात अशें निवाड्यांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
