भांगरभूंय | प्रतिनिधी
उपजिल्होधिकाऱ्यांक भेटयलें निवेदन
काणकोण: फाटल्या 6 म्हयन्यां पयलीं उक्तावण केल्ल्या काणकोण रवींद्र भवनांत खूबशो त्रुटी आसून त्यो पयस करपा संबंदी जर्नादन भंडारी हांच्या मार्गदर्शना खाला उपजिल्होधिकारी मधू नार्वेंकार हांकां निवेदन भेटयलें.
ह्या भवनांतल्यो विवीध यंत्रणा पुराय तांकीन कार्यरत नाशिल्ल्यान कलाकार आनी नागरिकां कडल्यान हे खातीर खर टिका जायत आसा. हाची दखल घेवन ‘काणकोणकार फॉर अ बेटर टुमारो’ ह्या बॅनरा खाला नागरिकांच्या एका गटान संबंदीत अधिकाऱ्यांक ह्या सांस्कृतीक केंद्रांतली गरजेची सुविधा सारकी करून दिवपा खातीर ताकतिकेन कारवाय करपाची मागणी केली.
जनार्दन भंडारी, विकास भगत, गास्पार कुतिन्हो, दत्ता गांवकार हांचे सयत हेरांनी उपजिल्होधिकारी मधू नार्वेंकार हांची भेट घेवन खूबशा उणावांची वळेरी दिवपी निवेदन तांकां भेटयलें.
भंडारी हांणी रवींद्र भवनाच्या उक्तावणा सावन खूबशे उणाव नदरेक हाडून दिले. वातानुकुलीन यंत्रणेचो उणाव आसा. ऑडियो सेटअपांत सेगीत इबाड जायत आसता, आनी वीज पुरवण खंडीत जायत आशिल्ल्यान कार्यावळीं वेळार आडमेळीं येतात हें अधोरेखीत केलें. तांणी नितळसाण कामागारांचो उणाव, अकार्यक्षम जनरेटर हे संबंदी निवेदनांत उल्लेख केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
