भांगरभूंय | प्रतिनिधी
उदका संसाधन मंत्री सुभाष शिरोडकार हांणी केली पळोवणीदिवचलः कुडाशेंत तिळारी कानाल फुटून कांय दीस जाले तरी गोंयांत उदका पुरवण जावंक ना. शुक्रारा सांजवेळार उदका संसाधन मंत्री सुभाष शिरोडकार हांणी मुखेल अभियंते प्रमोद बदामी आनी हेर अधिकाऱ्यां वांगडा तिळारी धरणाची पळोवणी केली परिस्थितीचो नियाळ घेतलो.
शिश्टमंडळा कडेन उलयतना उदका संसाधन मंत्री सुभाष शिरोडकार हांणी कानालाचें काम पुराय नेटान चालू आसा आनी शेनवार आनी सोमारा मेरेन कानालाची दुरुस्ती जावन उदका पुरवण सुरळीत जाली, अशें तांणी सांगलें.
फुटिल्लें कानाल खूब व्हड आसून ताका लागून समस्या निर्माण जाल्या. तरी गोंय आनी महाराष्ट्राच्या सहकार्यान आधुनीक यंत्रणेचो उपेग करून हें काम पुराय करपाचें काम सुरू आसा.
उदकाची पुरवण सुटसुटीत करपा खातीर उदका संसाधन खातें अथक खर कश्ट घेता, जाका लागून सोमारा सांजवेळा मेरेन तिळांचें उदक गोंयांत निश्चीत पावतलें असो विस्वास शिरोडकार हांणी उक्तायलो.
ह्या वेळार तांणी तिळारी धरणाकय भेट दिवन तांची पळोवणी केली. तांचे वांगडा मुखेल अभियंते प्रमोद बदामी आनी महाराष्ट्र धरणाचो अधिकारी विनायक जाधव हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
