भांगरभूंय | प्रतिनिधी
जानेवारींत 13.69 लाखांचें ड्रग्स जप्त
म्हापशें, प्रतिनिधी ः कळंगुटे आनी म्हापशें पुलिसांनी ड्रग्स विरोधी कारवाय खाला तीग जाणांक अटक केली. तांचे कडल्यान 5.5 लाखांचो एमडीएमए आनी गांजो जप्त केलो. मजगतीं उत्तर गोंय पुलिसांनी जानेवारींत 10 गुन्यांव नोंद करून 13.69 लाखांचें ड्रग्स जप्त केलां. जाल्यार एका विदेशी नागरिका सयत 10 जाणांक अटक केल्या.
शेनवारा सुमार साकळीं म्हापशें पुलिसांनी माडानी – पर्रा धाड घालून 3 लाखांचो गांजो जप्त केलो. ह्या प्रकरणांत दुबावित सुख माझी (29) आनी चंदन सेठी (23) हांकां अटक केली. जानेवारींत उत्तर गोंय पुलिसांनी 10 जाणांक अटक करून 13.69 लाखांचे ड्रग्स केलें जप्त.
दुबावीत चंदन सेठी हो कळंगुटेच्या एका हॉटेलांत बाउन्सर म्हणून काम करतालो. जाल्यार दुबावीत सुखा माझी हो हाचे आदीं कळंगुटेतल्या एका हॉटेलांत काम करतालो.
दुसरें वटेन कळंगुटे पुलिसांनी नायकावाडो – कळंगुटेच्या गॅस स्टेशना लागसार धाड घालून अडेच लाखांचो २५ ग्राम एमडीएमए जप्त केलो. ह्या प्रकरणांत दुबावित अखिल म्हाळसेकार (२४, सांगोल्डा) हाका अटक केली.
पुलीस अधीक्षक अक्षत कौशल, उपअधीक्षक संदेश चोडणकार, उपअधीक्षक विश्वेश कर्पे आनी निरिक्षक निखिल पालेकार आनी परेश नायक हांच्या फुडारपणा खाला म्हापशें आनी कळंगुटे पुलिसांनी ही कामगिरी केली.
मजगतीं, उत्तर गोंय पुलिसांनी जानेवारी म्हयन्यांत ड्रग्स विरोधी 10 गुन्यांव नोंद केल्यात. ह्या गुन्यांवा खाला 1 विदेशी, 5 देशी आनी 4 थळावे मेळून 10 जाणांक अटक केल्या. तशेंच 204 ग्राम चरस, 9 किल 849 ग्राम गांजो आनी 25 ग्राम एमडीएमए मेळून वट्ट 13.69 लाखांचो 10.078 किल घुंवळी वखदां जप्त केल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
