भांगरभूंय | प्रतिनिधी
फोंडें, प्रतिनिधी ः फोंडें वाठारांत रातच्या वेळार रस्त्यार आनी रस्त्या कुशीक सोरो पियेवन मस्ती करप्यां आड कारवाय करपा खातीर मोहीम सुरु केलां. हे मोहीमे वेळार काल बिरेस्तारा रातीं रस्त्याचेर बसून सोरो पियेवपी अर्जुन शिवपुत्र कोलकार (34, दीपनगर- कुर्टी), अनिल शिवपुत्र कोलकार (32, दीपनगर- कुर्टी), समीर बाबूसाब मुल्ला (35, झिंगडीमळ- कुर्टी), यमपा बसप्पा बिजुर (33, हवेली- कुर्टी) आनी दुस्तान जुझे रॉड्रिगीस (24, बांदोडें) हांकां ताब्यांत घेतले.
फोंडें पुलीस निरिक्षक विजयनाथ कवळेकार हांच्या फुडारपणा खाला रातच्या वेळार रस्त्यार आनी रस्त्या कुशीक सोरो पियेवपी लोकां आड कारवाय करपा खातीर सत्र सुरू केलां. पयलेच रातीं फोंडें पुलिसांनी वट्ट 5 जाणांक ताब्यांत घेतलें. सोरो पियेवन गाडी चलोवपाक लागून रातच्या वेळार अपघात जातात, झगडीं जातात, वेगवेगळ्यो घडणुकी घडटात. हे खातीर फोंडें पुलिसांनी सोरो पियेवपी लोकांचेर खर कारवाय करपाक सुरवात केल्या. ही मोहीम अशीच कायम चालू उरतली अशें निरिक्षक कवळेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
