बायलां सुरक्षे वेल्यान काँग्रेसीची आझाद मैदानाचेर निदर्शनां

भांगरभूंय | प्रतिनिधी

पणजी, प्रतिनिधी: गोंयात जावपी बलात्कार आनी बायलांचे अत्याचारावेल्यान गोंय प्रदेश युवा काँग्रेसीन शुक्रारा आजाद मैदानाचेर सरकारा आड निदर्शनां केलीं. ‘बेटी बचाओ बेटी पढ़ाओ’ च्यो घोशणा दिवपी भाजपाचे सरकार बायलांक सुरक्षा दिवपाक अपेसी थारला असो आरोप करून काँग्रेसीच्या फुडाऱ्यांनी राज्य सरकाराक वडीर काडलें. बलात्कार जातकच मुख्यमंत्री दोशींचेर टिका करतात, पुण कृती कांय करीनात, असो आरोप ह्या वेळार तांणी केलो.
काँग्रेस पक्षाच्यो वेगवेगळ्यो संघटनां ह्या निर्दशनांत वांटेकार जाल्ल्यो. युवा काँग्रेस, प्रदेश समिती, बायलां फुडाऱ्यांनी ह्या निदर्शनांक समर्थन दिले. काँग्रेसीची राष्ट्रीय फुडारी देवसुर्बी यदुवंशी, गोंय प्रदेश काँग्रेस समितीची सरचिटणीस मनीशा उसगांवकार, युवा काँग्रेसीचे अध्यक्ष महेश नाडार, उपाध्यक्ष वैष्णव पेडणेकार, सरचिटणीस प्रसनजीत ढगे, पणजी काँग्रेस गट अध्यक्ष प्रतिभा बोरकार, शिवोले काँग्रेस गट अध्यक्ष पार्वती नागवेकार आनी हेर फुडारी हजर आशिल्ले.
गोंयात जावपी बलात्काराचे घडणुके आड लोक आवाज करीत आसात, पूण सरकार फक्त उलयता, कृती कांय करना, असो आरोप देवसुर्बी यदुवंशी हांणी केलो.
कांय दिसां पयलीं एका दिव्यांग चलयचेर सामुहीक बलात्कार जाल्लो. बायलां आड गुन्यांवकारी घडणुकांनी वाड जायत आसा. एक वटेन सरकार बेटी बचाओ बेटी पढ़ाओचें नारे दिता पूण दुसरे वटेन बायलां सुरक्षे विशीं कसलीच पावलां उखलीना. 50 टक्के लोकसंख्या असुरक्षित आसा. जर कितें वायट जाल्यार सरकार ओग्गी बसता, असोय आरोप यदुवंशी हांणी केलो.
फाटल्या सप्तकात जाल्ल्या सामुहीक बलात्काराचे घडणुकेन आमचे दोळे उक्ते केल्यात. गोंय हे दिल्लीच्या पावलाचेर पावल दवरून बलात्काराची राजधानी जावपाक पावल्या. दर दिसा बायलांचेर अन्याय जाता, बायला सुरक्षित नात, सरकार करता किदें ते खबर ना. पुलिसांचे पेट्रोलींग सारके जायना, बलात्काऱ्यांक कायद्याचो भंय ना जाला, हे खातीर हांव पुलिसांक न्हय, तर सरकारांक दोश दिता. चलयां खातीर सेल्फ डिफेन्स वर्ग अभ्यासक्रमात घालचो हो विशय बायलां खातीर आसपाकच जाय, अशी मागणी नाडर हांणी केल्या.