भांगरभूंय | प्रतिनिधी
नवी दिल्ली, खबरां संस्था ः नॅशनल पेमेंट्स कॉर्पोरेशन ऑफ इंडिया (NPCL) कांय दिसां आदीं आपल्या नेमांत व्हड बदल केला. ह्या बदला प्रमाण आतां यूपीआय आयडींत कसलेच स्पेशल कॅरेक्टर दिवंक मेळनात. 1 फेब्रुवारी 2025 उपरांत यूपीआय आयडी वा वेव्हार आयडींत स्पेशल कॅरेक्टर्स (@, !, #) आसल्यार पेमेंट फेल जातलो. तुमच्या यूपीआय आयडींत स्पेशल कॅरेक्टर्स आसल्यार तुमकां तें रोखडेंच बदलचें पडटलें. हो नेम फाल्यां, 1 फेब्रुवारी सावन लागू जातलो. तुमी वेळार बदल करूंक ना जाल्यार तुमकां यूपीआय पेमेंट करपाक मेळचो ना.
9 जानेवारीक एनपीसीएलान एक परिपत्रक जारी करून नव्या नेमाची म्हायती दिल्ली. यूपीआय ट्रांजेक्शन आयडी फकत अल्टान्यूमेरिक आसूं येता अशें स्पश्ट केल्लें. म्हणल्यार तातूंत फकत क्रमांक आनी अक्षरां आसतलीं आनी कसलेंच स्पेशल कॅरेक्टर दिवचें नात. ट्राजेक्शन आयडींत स्पेशल कॅरेक्टर आसल्यार सिस्टम आपोआप पेमेंट रिजेक्ट करतली.
तुमकां कितें बदलपाची गरज आसा?
व्हड पेमेंट अॅप्स आपोआप यूपीआय आयडी तयार करतात, पूण वापरप्यांक कस्टम यूपीआय आयडी वा सद्याचे आयडींत बदलपाचो पर्याय आसा. तुमच्या सद्याच्या युपीआय आयडीत खंयचेय स्पेशल कॅरेक्टर आसल्यार, तुमकां तें एडिट करपाचो पर्यायय मेळटलो, देखून तुमी तातूंतल्यान स्पेशल कॅरेक्टर काडून उडोवंक शकतले. ते भायर, कांय पेमेंट अॅप्स आपोआप तुमचो सद्याचो आयडी बदलतले.
नेमके कितें बदलतलें?
साद्या उतरांनी सांगपाचें जाल्यार तुमचो फोन क्रमांक 999888777222111 सारको आसत जाल्यार आनी तुमची बँक एचडीएफसी आसल्यार, मागीर पेमेंट ॲप्स आपोआप तुमचो यूपीआय आयडी तयार करतात. देखीक, तुमचो आयडी 999888777222111@okhdfcbank आसूं येता. पूण आतां हाचे वरवीं पेमेंट करपाक मेळचो ना. आतां फकत 999888777222111okhdfcbank सारकिल्ले आयडी वैध आसतले. तशेंच, तुमी कस्टम यूपीआय आयडी तयार केला जाल्यार, तुमकां तातूंतय बदल करचे पडटले. देखीक, तुमी rohit@sharma@upi सारको आयडी तयार केला जाल्यार आतां तातूंतले स्पेशल कॅरेक्टर काडून उडोवचे पडटले मागीर तुमचो आयडी rohitsharmaupi सारको आसल्यार चलता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
