गोंयच्या दर्यादेगां वेले शॅक

भांगरभूंय | प्रतिनिधी

एकंदर कारभार पळेत जाल्यार पर्यटन खात्याचें दर्यादेगांचेर किदें चल्लां हाचे कडेन लक्ष नासता अशें दिसून येता. पर्यटन खात्याचो शॅक धनयांचेर वचक आसप गरजेचें आसा.

गोंय हें ल्हानशें राज्य. गोंयाक सैमान भरभरून दिलां. गोंयांत लागीं लागीं 45 दर्यादेगो आसात. हातूंत पाळोळें, कोलवें, मिरामार, कांदोळे, कळंगूट, बागा, वागातोर सारख्यो दर्यादेगो भारतांतूच न्हय तर विदेशांत लेगीत खूब फामाद आसात. म्हणून देशांतलेच न्हय जाल्यार विदेशांतले पर्यटक लेगीत ह्या दर्यादेगांक भेट दिवपाक गोंयात येतात. पर्यटनाच्या मळार गोंयाक एक मानाची सुवात फावो जाल्या. गोंयच्या दर्यादेगे वेले एक खास आकर्शण म्हळ्यार शॅक्स. शॅक्स म्हळ्यार ल्हानशी उपहारगृहां. जातूंत खावपाच्या जिनसां वांगडाच सोरोय मेळटा. हेर रॅस्टोरंण्टां परस शॅकांतल्या जेवपा खावपाच्या जिन्नसांचें मोल मात्शें चड आसता. सगल्यांकूच तें परवडना. दर वर्सा राज्य सरकार कांय शुल्क घेवन थळाव्या लोकांक दर्यादेगेर शॅक घालपाक परवानगी दितात.
पावस सोंपलो की गोंयांत व्हड संख्येन देशी आनी विदेशी पर्यटक येवपाक लागतात. पर्यटकांच्या आगमनान दर्यादेगो सामक्यो गजबजून वतात. राज्य सरकारान जांकां दर्यादेगेर शॅक घालपाची परवानगी दिल्ली आसता ते लोक आपापले शॅक उबारतात. हालीं तेंपार ह्या शॅक्सांक लागून दर्यादेगांक ओंघळ स्वरूप प्राप्त जालां. कायद्या प्रमाण दर एक शॅकधनयाक ताच्या शॅका सामकार 10 सनबेड घालपाची परवानगी दिल्या. पूण कांय शॅकधनी ह्या नेमाक पाळो दिनासतना 20 ते 30 सनबेडी घालतात. तांतूत दर्यांत पर्यटकांक उदकासफरी खातीर घेवन वचपी आपल्यो बोटी दर्यादेगेर दवरतात. हाका लागून पर्यटकांक निवांतपणान भोंवपाक मेळना. तातूंत रस्ताद सुणीं आनी लामाणी बायलां, फेरी विक्रेत्यांची भर. देखून बऱ्या पर्यटकांक चड वेळ दर्यादेगेर बसचें अशें दिसना. दर्यादेगेर उक्तडार सोरो पियेवपाक कायद्यान मनाय आसून लेगीत कांय पर्यटक दर्यादेगेर सोरो पियेतना दिश्टी पडटात.
दुसरें म्हळ्यार पर्यटन खात्याच्या कायद्या प्रमाण शॅक धनयाक ताचो शॅक दुसऱ्याक चलोवंक दिवंक मेळना. पूण खूबशे गोंयकार शॅक धनी आपल्या दुडवांचे आशेन दुसऱ्या लोकांक भाड्यान आपलो शॅक चलोवंक दितात. हें कायद्याचें पुरायपणान उल्लंघन जावन आसा.
हालींच असो प्रकार हरमलचे दर्यादेगेर घडिल्लो पर्यटन खात्याचे नदरेक आयलो. तांणी बेगोबेग कारवाय करून त्या शॅक धनयाचो परवानो रद्द केलो आनी ताका 25 लाख रुपयांचो दंड फर्मायलो. तशेंच ताचो शॅक सात दिसां भितर मोडून उडोवचो असो आदेश दिलो. अशे तरेची कारवाय पर्यटन खातें सातत्यान करीत रावलें जाल्यार गोंयच्या शॅक धनयांक वचक बसतलो आनी ते कायद्याचें उल्लंघन करपाक धजचें नात. शॅक हें गोंयकाराक धंदो करपा खातीर पर्यटन खात्यान दिल्लें आसा. तें गोंयकारानूच चलोवंक जाय. हालीं तेंपार दर्यादेगार ह्या शॅकांक लागून खूबशे बलात्कार, खुना सारक्यो आगळिको जावपाक लागल्यात. हें बंद जावंक जाय. नाजाल्यार गोंयचें नांव पिड्ड्यार जातलें आनी पर्यटक गोंयांत येवपाचे उणें जातले.
एकंदर कारभार पळेत जाल्यार पर्यटन खात्याचें दर्यादेगांचेर किदें चल्लां हाचे कडेन लक्ष नासता अशें दिसून येता. पर्यटन खात्याचो शॅक धनयांचेर वचक आसप गरजेचें आसा. फक्त शुल्क घेवन शॅक घालपाक परवानगी दिली म्हणून पर्यटन खात्याची जबाबदारी सोंपना. दर्यादेगांचेर बेशिस्तपणां वाडलीं जाल्यार बरे पर्यटक दर्यादेगांचेर पांय दवरचेनात हें मतींत दवरूंक जाय. दर्यादेगो नितळ आसूंक जाय. पर्यटकांक दर्यादेगेर फिरन दिसूंक जाय. पर्यटन हो गोंयच्या अर्थीक उदरगतीचो कणो हें विसरून फावना. दर्यादेगो नितळ आसत जाल्यार विदेशी पर्यटक व्हड प्रमाणांत गोंयांत येतले आनी ताचो लाव थळाव्या लोकांक आनी पर्यायान गोंय सरकाराक जातलो. म्हणून पर्यटन खात्यान दर्यादेगांचेर नदर दवरूंक जाय आनी बेशिस्तपणाक थारो दिवंक फावना.

अनील कामत शंखवाळकार
9763718518