भांगरभूंय | प्रतिनिधी
फुडल्या म्हयन्यांत 19 फेब्रुवारी ते 9 मार्च मजगतीं पाकिस्तान आनी दुबयंत एका दिसांच्या मॅचींची चॅम्पियन करंड सर्त जावपाची आसा. हे सर्ती खातीर निवड समितीचे अध्यक्ष अजीत आगरकर आनी मुखेली रोहीत शर्मा हांणी 15 वांगड्यांच्या भारतीय पंगडाची घोशणा केली. ह्या पंगडांत रोहीत शर्मा आनी शुभमन गील हे भारताचे अणभवी आनी तरणाटे खेळगडे भारताच्या डावाची सुरवात करतले. विशेश म्हणल्यार हे दोगूय ह्या पंगडाचे मुखेली आनी उपमुखेली आसात. हांचे बरोबर तिसरो ओपनर म्हूण यशस्वी जयस्वाल हाची निवड केल्या.
मदले फळयेची जापसालदारकी अणभवी विराट कोहली, श्रेयस अय्यर, के एल राहूल तशेंच विकेटकिपर ऋषभ पंत हांचेर घाल्या. अणभवी के एल राहूल हो दुसरो विकेटकिपर म्हूण जापसालदारकी पार पाडटलो. विशेश म्हणल्यार दोगूय बरे फिनिशर म्हूण आपली जापसालदारकी पार पाडटात. भारताची बॅटींग बळिश्ट आसून रोहीत, शुभमन आनी विराट हे पयल्या तीन क्रमांकाचे बॅटसमन संवसारांतले बरे बॅटसमन म्हूण मानतात. एका दिसाचे मॅचींत ह्या तिगांची कामगिरी बरी आसून तिगूय एका दिसाच्या मॅचींतले श्रेश्ठ बॅटसमन म्हूण मानतात.
भारतांत जाल्ल्या एका दिसाच्या संवसारीक करंड सर्तींत तशेंच फाटल्या वर्सा वेस्ट इंडीजांत जाल्ल्या टी 20 संवसारीक करंड सर्तींत तिगांनीय बरी कामीगरी केल्या. ह्या तिगांची टॅस्ट मॅचींतली कामगिरी तांचे नामनेक फावोशी जाली ना, ते खातीर टिका जाल्ली. पूण मर्यादीत ओव्हरींचे मॅचींत तांची कामगिरी नदरेंत भरपा सारकी आसा. सद्या जरी ते तांच्या बऱ्या फॉर्मांत नासले तरी ते हे सर्तींत परतून आपल्या पयलींच्या फॉर्मांत येवंक शकतात. जर ते परतून फॉर्मांत आयले जाल्यार चॅम्पियन करंड जिखपाची भारताक आस्त आसा. चौथ्या क्रमांकाचेर श्रेयस अय्यर येतलो. भारताचो तो भरवंशाचो बॅटसमन आसून एका दिसाच्या संवसारीक करंड सर्तींत ताणें पांचशें परस चड धांवड्यो काडल्यात. तो फ्लॅप गेलो जाल्यार ताची सुवात के एल राहूल घेतलो. तो मैदानार सगले वटेन शॉट मारूंक शकता. तोवूय भारताचो भरवंशाचो बॅटसमन मानतात. उपरांत ऋषभ पंत हो घातक विकेटकिपर बॅटसमन मैदानार येतालो. तो स्फोटक बॅटसमन आसून मॅच फिनीशर आसा. उण्या बॉलांत चड धांवड्यो काडून पंगडाक जैत मेळोवन दिवपी तो बॅटसमन. उपरांत हार्दीक पांड्या हो संवसारांतलो सद्याचो बरो अश्टताशी खेळगडो येतलो. तो बॉलींग, स्फोटक बॅटींग आनी प्रभावी फिल्डींग करून पंगडाच्या जैतांत मोलाची भुमिका वठयता. ताणें आपल्या अश्टताशी खेळान भारताक खूबशीं जैतां मेळोवन दिल्यांत.
वॉशिंग्टन सुंदर हो आनीक एक अश्टताशी खेळगडो भारतीय पंगडांत आसा. ऑफस्पीन बॉलींग आनी घातक बॅटींग हीं ताचीं खाशेलींपणां आसात. बॉलिंगेंत निवड समितीन तीन स्पीन बॉलरांक संद दिल्या. अणभवी रवींद्र जडेजा हाचे बरोबर फॉर्मांत आशिल्लो कुलदीप यादव आनी लेफ्ट आर्म स्पिनर अक्षर पटेल हांकां संद मेळ्ळ्या. तिगूय दावखुरे मंदगती बॉलर आसात. ताका लागून मदंगती बॉलिंगेंत विविधताय नाशिल्ल्याची टिका टिकाकार करीत आसले तरी तिगूय फॉर्मांत आसात. जडेजा हो भारताचो बरो मंदगती बॉलर आसा. तशेंच तो बॅटींग लेगीत बरी करता आनी बरो फिल्डर आसा. म्हणल्यार तो एक बरो अश्टताशी खेळगडो आसा.
कुलदीप यादव जरी दावखुरो आसलो तरी तो चायनामन बॉलर आसा, आनी विशेश म्हणल्यार तो फॉर्मांत आसा. फॉर्मांत आशिल्ल्या खेळगड्याक संद दिवप केन्नाय बरें. अक्षर पटेल बॉलिंगे बरोबर बॅटिंगूय बरी करूंक शकता. तो भारता खातीर बोनस बॅटसमन थारतलो. जसप्रीत बुमराह आनी मोहम्मद शमी हे अणभवी फास्ट बॉलरां सयत अर्शदीप सिंग ह्या तरणाट्या बॉलराक लेगीत निवड समितीन संद दिल्या. निवड समितीन ह्या दावखुऱ्या फास्ट बॉलराक संद दिवन फास्ट बॉलिंगेंत विविधताय हाडपाचो यत्न केला. मर्यादीत ओव्हरींच्या मॅचींनी दावखुऱ्या फास्ट बॉलरांचें म्हत्व अनन्यसादारण आसा.
2011 वर्सा झहीर खान ह्या दावखुऱ्या फास्ट बॉलरान अप्रतीम कामगिरी करून भारताक संवसारीक करंड मेळोवन दिल्लो. इतलेंच न्हय तर फाटल्या वर्सा भारतान जिखिल्ल्या टी 20 संवसारीत करंड सर्तींत अर्शदीप सिंगान सगल्यांत चड विकेटी घेतिल्ल्यो. डाव सोंपत येता तेन्ना डेथ ओव्हरींत अर्शदीप सिंगाची बॉलींग प्रभावी थारता. निवड समितीन वेंचिल्लो हो पंगड बरो आसा. पोरण्या आनी नव्या खेळगड्यांक संद दिवन जोश आनी होश हांचें संतुल सादपाचो यत्न निवड समितीन केला. तातूंत ते बरे पैकीं येशस्वी थारल्यात. चॅम्पियन करंडा खातीर वेंचिल्लो पंगड संतुलीत आसा हें मान्य करून निवड समितीचें हे खातीर अभिनंदन करचें पडटलें. आतां जापसालदारकी आसा ती वेंचिल्ल्या ह्या 15 खेळगड्यांची.
2013 उपरांत भारताक चॅम्पियन करंड जिखपाक अपेस आयलां. हें अपेस पुसून नव्यान सुरवात करपाची संद ते निमतान ह्या पंगडाक मेळटली. 1998 वर्सा सुरू जाल्ली ही सर्त भारतान 2002 आनी 2013 वर्सा जिखल्या. जाल्यार 2017 वर्सा भारत हे सर्तीचो उपवस्ताद थारिल्लो. हे सर्ती खातीर निवड जाल्ले सगले खेळगडे अणभवी आसात. एका दिसाच्यो मॅची खेळपाचो सगल्यांक मोटो अणभव आसा, आनी सगल्यांत म्हत्वाचें म्हणल्यार ही सर्त पाकिस्तानांत जातली. पूण भारताच्यो सगल्यो मॅची दुबयंत जातल्यो. पंगडांत निवड जाल्ल्या सगल्या खेळगड्यांक दुबयंत खेळपाचो बरो अणभव आसा. ताका लागून देशा खातीर बरी कामगिरी करून भारताक 12 वर्सां उपरांत चॅम्पियन करंड जिखून दिवपाची जापसालदारकी ते येसस्वीपणान पार पाडटले अशी आस्त धरुया. भारतीय पंगडाक एका दिसाचे चॅम्पियन करंड सर्ती खातीर मनांतल्यान शुभेत्सा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
