भांगरभूंय | प्रतिनिधी
फाटलीं स वर्सां गोंयच्या अंत्रुज म्हालांत परिक्रमा हो वैचारीक उपक्रम जाता. हो दोन दिसांचो विचारांचो उत्सव राज्याचें गिरेस्त सांस्कृतीक दायज दाखोवप आनी ताचो सांबाळ करप हें ध्येय घेवन आयोजीत करतात. तरणाटे प्रतिभेक चालना दिवपाक एक मंच दिता. अंदूं मडगांवच्या रवींद्र भवनाच्या पालवान नव्या थळार ‘परिक्रमा’ जाता आनी आदले परस सुदारीत आनी व्हड आवाठ घेवन हो उत्सव मनोवपाक आयोजक नेटान पावलां मारीत आसात.
युगांक नायक अध्यक्ष आशिल्ले ‘नॉलेज टर्मिनस’ हे संस्थेन आयोजीत केल्लो हो परिक्रमा महोत्सव गोंयचे संस्कृतायेची विवीधताय दाखोवपा खातीर आनी तरणाट्यांक अभिव्यक्त जावपाक एक आगळोच मंच मेळोवन दिवपा खातीर तयार केला. महोत्सवाचे अंदू ‘द कॉन्क्लेव’ आनी ‘झीरो फेस्ट’ अशे दोन विभाग आसात.
द कॉन्क्लेव: सेरेब्रेट आयडियाज
सोद निबंद, काणयेकार (कथा लेखन आनी सादरीकरण), म्हायतीपट निर्मिती, इन्फोग्राफिक्स अशा सर्तीं वरवीं उत्कृश्टतायेचेर भर दिवपी शिक्षणीक कार्यावळ म्हणल्यार द कॉन्क्लेव्ह. महोत्सवाच्या ह्या विभागांत विद्यार्थ्यांक आनी तरणाट्या संशोधकांक आपलें काम दाखोवपाची आनी आपल्या वांगड्या कडेन सर्त करपाची एक आगळीच संद मेळटा.
झीरो फेस्ट
दुसरे वटेन झीरो फेस्ट हो एक उर्बेभरीत संस्कृतीक उपक्रम. तातूंत कला सादरीकरण आनी सृजनशीलताय मनयतात. गोंयची पारंपारीक लोकजीण आनी जागतीक प्रभावांचो मेळ घालून झीरो फेस्ट तरणाटे संगीतकार, नृत्य कलाकार, नाट्य कलाकारांक तांची प्रतिभा दाखोवपाक एक माची दिता.
प्रतिभेचें सशक्तीकरण
तरणाट्या प्रतिभावंत कलाकारांचो प्रचार जावचो, तांचे कलेक पोसवण मेळची हो ह्या परिक्रमा उपक्रमा फाटलो मुख्य उद्देश. दर वर्सा झीरो फेस्ट जैतिवंतांक हेर महोत्सवांत तशेंच नामनेच्या कार्यावळींनी प्रेक्षकां मुखार सादरीकरण करपाक आपयतात, जाका लागून तांकां आपली कला गोंयभर सादर करपाची संद मेळटा.
दायज सांबाळप
परिक्रमा हो फकत उत्सव न्हय, तर गोंयचें सांस्कृतीक दायज तिगोवन दवरपाची चळवळ. फाटल्या वर्सांनी ह्या महोत्सवांत गोंयांतल्यान संशोधनात्मक निबंद, म्हायतीपट आनी कथांचो संग्रह तयार केला, जो फुडल्या पिळग्यां खातीर मोलादीक संसाधन म्हणून काम करतलो.
एक व्यापक कोंकणी भंडार तयार करपा खातीर हे संस्थेन एक घटमूट यंत्रणा तयार केल्या. फाटल्या सात वर्सांत संशोधन निबंद, म्हायतीपट, ब्लॉग, नाटक, गितां, कथा, अणकार, तशेंच रुपांतरीत नाट्य संहिता हांचें संकलन केलां. विंगड विंगड प्रकारांनी हे संस्थेन गिरेस्त सामुग्री तयार केल्या. आतां ह्या संग्रहांत सुमार 150 साबार तरेचें साहित्य आसा, जें खंयच्याय नव्यान स्थापन जाल्ल्या संस्थे खातीर भोव मोलादीक.
जागतिकीकरणाच्या ह्या काळांत गोंयचें सांस्कृतीक दायज तिगोवन दवरपाक फुडले पिळगेक सशक्त करप गरजेचें आसा अशें परिक्रमाच्या आयोजकांचें मत. तरणाट्या प्रतिभावान कलाकारांक आपली अभिव्यक्ती करपाक एक मंच दिवप, तशेंच राज्याचें गिरेस्त सांस्कृतीक दायज मुखार व्हरप, फुडले पिळगेच्या कलाकारांक, संगीतकारांक आनी विचारवंतांक पांखां दिवपाचो हेतू परिक्रमा बाळगिता.
कला आनी संस्कृती मंत्री गोविंद गावाडे हे परिक्रमा 0.7 उपक्रमाचे येवकार अध्यक्ष आसात. परेश नायक 0.7 चो क्युरेटर. ह्या वर्सा मडगांवच्या रवींद्र भवनाच्या जोडपालवान परिक्रमा 0.7 आयोजीत केला. 1 आनी 2 फेब्रुवारी दिसा मडगांवां रवींद्र भवनांत जावपी परिक्रमा 0.7 महोत्सवांत कलाकारांनी, आस्वादकांनी व्हड संख्येन वांटो घेवचो आनी संस्कृताय, कल्पनाशक्त, तरणाटे प्रतिभेचो हो जिवो उत्सव जैतिवंत करचो, अशें आयोजकांनी मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
