भांगरभूंय | प्रतिनिधी
लोकांक घांस मारपाच्या प्रकारांनी वाड
फोंडें: नागामशीद- कुट्टी वाठारांत रस्ताद सुणीं वाडल्यांत. तशेंच ह्या सुण्यां कडल्यान रस्त्या वेल्यान वचपी लोकांक घांस मारपाच्या प्रकरणांत वाड जाल्या. अदमाशेक 100 परस चड रस्ताद सुणीं थळावे आनी हेर लोकां खातीर घातक थारल्यांत. वाठारांत भोंवपी ह्या सुण्यांचेर लक्ष दिवपाची मागणी लोकां कडल्यान जायत आसा.
नागामशीद कुट्टी वाठारांत रस्ताद सुण्यांचो वावर थळाव्या लोकां खातीर घातक जाला. रस्त्यार भोंवपी सुण्यां कडल्यान लोकांक घांस मारपाच्या प्रकरणांत सुमारा भायर वाड जाल्या. थळाव्या लोकांनी दिल्ले म्हायती प्रमाण दोन म्हयन्यां पयलीं एका पांच वर्सां पिरायचे चलयेक ह्या सुण्यां कडल्यान घांस मारपाचो प्रकार घडिल्लो. ताका लागून हीं सुणीं ल्हान भुरग्यां खातीर घातक थारल्यात. नागामशिदी बरोबर हावजींग बोर्ड-कुट्टी वाठारांत रस्ताद सुण्यांचाे वावर वाडला.
फोंडेंच्या उपजिल्हो हॉस्पिटलांत सुणीं चाबिल्ल्या दुयेंतीचेर उपचार करतात. फाटल्या दोन वर्सांत 2 हजारां परस चड दुयेंतीचेर उपचार केल्ल्याची नोंद हॉस्पिटलांत जाल्या. हातूंत 2023 वर्सा 1217 जाल्यार 2024 वर्सा 1127 सुण्यांनी घांस मारिल्ल्या दुयेंतींचेर उपचार केले. ताका लागून फोंडें वाठारांत सुणीं चाबपाच्या प्रकारांत सुमारा भायर वाड जाल्ल्याचें दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
