भांगरभूंय | प्रतिनिधी
सिप्ला कंपनीक दिल्ली जमीन सरकारान घेतली परतून
पणजीः केरी भूतखांब्यार सेझ खाला सिप्ला कंपनीक दिल्ले जमनीचेर आतां हरीत प्रकल्प येतलो. सिप्ला कंपनीक दिल्ली जमीन सरकारान परतून घेतिल्ल्यान हेच जमनीचेर नवो प्रकल्प सुरू जातलो, अशी म्हायती मुख्यमंत्री डॉ. प्रमोद सावंत हांणी दिली. मंत्रीमंडळ बसके उपरांत ते पत्रकार परिशदेंत उलयताले.
फेब्रुवारींत दोन दिसांचें अधिवेशन जातलें. ते खातीर गोंय जीएसटी दुरुस्ती विधेयक 2025, गोंय मूल्यवर्धीत कर (वॅट) दुरुस्ती विधेयक 2025 आनी गोंय लेजिस्लेटीव डिप्लोमा दुरुस्ती विधेयक 2025 हांकां मान्यताय दिल्या. केंद्र सरकारान जीएसटी कायद्यांत बदल केल्ल्यान सरकाराक विधानसभेंत दुरुस्त्यो संमत करच्यो पडटल्यो. मंत्रीमंडळान दुरुस्ती विधेयकांक मान्यताय दिली आसली तरी ह्या अधिवेशनांत ती मांडटलेच अशें ना. हें अधिवेशन 2 दिसांचें आशिल्ल्यान वेळ मेळूंक ना जाल्यार फुडल्या अधिवेशनांत हीं विधेयकां सादर करतले, अशें मुख्यमंत्र्यान सांगलें.
आदिवासी विद्यार्थ्यां खातीर मुख्यमंत्री शिक्षण साहाय्य येवजण अर्थसंकल्पांत जाहीर केल्ली. तिची कार्यवाही आतां सुरू जातली. हे येवजणेक मंत्रीमंडळान मान्यताय दिल्या. अर्थ खात्यांत चार्टर्ड अकावंटंटाची कायमस्वरूपीं पदां तयार करतले. ते मेरेन चार्टर्ड अकावंटंटाचें पद कंत्राटी पद्दतीन भरपाक मंत्रीमंडळान मान्यताय दिल्या. किर्लपाल- दाभाळच्या सांतेरी देवस्थानाचें सोबितीकरण आनी खांडोळें सरकारी म्हाविद्यालयाची दुरुस्ती करपाक सरकारान मान्यताय दिल्या. खण खात्यांत खण अभियंतो आनी जिओलोजिस्टाचीं पदां तयार जातलीं. तशेंच गोंय वैजकी म्हाविद्यालयांतल्या विज्ञान विभागांतल्या दोन व्याख्यात्यांचीं पदां कंत्राटी पद्दतीन भरपाक मान्यताय मेळ्ळ्या. मुरगांवां प्राथमीक भलायकी केंद्रा खातीर 4 हजार चौखण मिटर जमीन दितले. महसूल खात्या कडेन आशिल्ली जमीन भलायकी खात्या कडेन हस्तांतरीत करपाचो निर्णय मंत्रीमंडळान घेतलो.
मुख्यमंत्री शिक्षण साहाय्य येवजणेक मान्यताय
धावी आनी बारावीच्या अनुसुचीत जमाती (एसटी) विद्यार्थ्यांक परिक्षेच्या शुल्का खातीर अर्थीक मजत दिवपी मुख्यमंत्री शिक्षण साहाय्य येवजणेक सरकारान मान्यताय दिल्या. मंत्रीमंडळ बसकेंत हे येवजणेक मान्यताय दिली.
अर्थसंकल्पीय भाशणांत मुख्यमंत्र्यांनी हे येवजणेची घोशणा केल्ली. आतां ती चालीक लावपाचो निर्णय घेतला, अशें मुख्यमंत्री डॉ. प्रमोद सावंत हांणी सांगलें. धावेच्या विद्यार्थ्याक परिक्षा शुल्का खातीर 1500 रुपया दिवपाची तजवीज येवजणेंत आसा. तशेंच बारावेच्या विद्यार्थ्याक 1700 रुपया दिवपाची तजवीज आसा.
इत्सूक एसटी विद्यार्थ्यांनी विहीत नमुन्यांत अर्ज भरून सादर करप गरजेचें आसा. अर्जा सयत विद्यार्थ्यांन प्रमाणीत केल्लो जातीचो दाखलो जोडपाक जाय. अर्जाचेर मुख्याध्यापकाची सय गरजेची आसा. मुख्याध्यापकान अर्ज तपासून म्हायती योग्य आशिल्ल्याचें प्रमाणीत करपाक जाय. शालांत मंडळचे परिक्षेच्या अर्जा सयत येवजणे खातीरचो अर्ज सादर करपाक जाय.
मूळ गोंयकार आशिल्ल्या विद्यार्थ्याकूच येवजणेचो लाव मेळटलो. धावी, बारावेंत 75 टक्के हाजेरीची अट आसा. राज्य सरकार तशेंच केंद्र सरकारच्या हेर येवजणेचो लाव घेवपी विद्यार्थी लेगीत ह्या येवजणे खातीर पात्र आसा. येवजणेची अधिसुचोवणी जारी जावपाची आसा. अर्ज सादर करपाची तारीख तशेंच हेर गजाली अधिसुचोवणेत आसतल्यो, अशी म्हायती गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
