भांगरभूंय | प्रतिनिधी
निलेश काब्रालः शेल्डें – कुडचड्यार चिल्ड्रन पार्काचें, ओपन जिमाचें उक्तावण
भांगरभूंय । प्रतिनिधी
केपें: भुरग्यांक मोबायल फोना पुरतेच मर्यादीत दवरिनासतना तांकां मैदाना वयले खेळ खेळुंदी, अशें कुडचडेंचे आमदार निलेश काब्राल हांणी सांगलें.
काकुमड्डी शेल्डें कुडचड्यार जिल्हो पंचायत फंडांतल्यान बांदिल्ल्या जॉयस चिल्ड्रन पार्क आनी ओपन जिमाचें उक्तावण केले उपरांत मुखेल सोयरे म्हूण काब्राल उलयताले. ह्या वेळार दक्षीण गोंय जिल्हो पंचायत अध्यक्ष संजना वेळीप, उपाध्यक्ष सिद्धार्थ गांवस देसाय, फ्लोरिना कुलासो, शेल्डेंची सरपंच कविता गांवस देसाय, उपसरपंच प्रमोद देसाय, नगरसेवक विश्वास सावंत, पंच जोहान फर्नांडीस, पंच मिनाक्षी चिमुलकार आनी हेर मानेस्त हाजीर आशिल्ले.
आयज भुरगीं मोबायलांत चड व्यस्त आसतात. ताका लागून तीं मैदाना वयल्या खेळां पासून पयस वतात. हे खातीर भुरग्यांक मैदाना वयले खेळ खेवपाक दियात. ह्या वाठारांत बरें चिल्ड्रन पार्क बांदला, ताचो फायदो सगळ्यांनी घेवचो, अशें काब्राल हांणी सांगलें.
कुडचडें मतदारसंघांतल्या लोकांक कसलोच त्रास जावपाक दिनासतना भुंयगत वीज आनी हेर प्रकल्प सुरू केल्यात. हे खातीर आयज लोकांक आयज मात्सो त्रास जाता आनी लोकूय समजून घेतात. मात कांय जाण राजकी फायदो घेवचे खातीर मुद्दो उपस्थीत करतात. उदरगतीचीं कामां करतना खंय उणें पडटात जाल्यार लोकप्रतिनिधी म्हूण आपले नदरेक हाडून दिवचें, अशेंय काब्राल हांणी सांगलें.
आयज भुरग्यां खातीर चिल्ड्रन पार्क उबारलां. ही बरी गजाल, ताचो भुरग्यांनी फायदो घेवचो, अशें संजना वेळीप हांणी सांगलें.
20 वर्सां आदीं चिल्ड्रन पार्क बांदिल्लें. ताचें नुतनीकरण करपाची गरज आशिल्ली. भुरग्यांक ह्या पार्कांत खेळपाची, व्हडल्यांक जीम सुविधा, तशेंच सीसीटीव्ही कॅमेरे लायल्यात. सगळ्यांच्या आदारान तशेंच आमदाराचे मजतीन हीं कामां जातात. ह्या पार्काचो सगळ्यांनीच सांबाळ करचो, अशें सिद्धार्थ गांवस देसाय हांणी सांगलें. डॉ. सर्वानंद सावंत देसाय हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
