भांगरभूंय | प्रतिनिधी
केरी भूतखांब्यार सिप्लाक दिल्ली जमीन घेतले परत, गोंय वॅट दुरुस्ती विधेयक मंजूर
पणजी ः पर्वरीच्या मंत्रालयांत जाल्ले मंत्रीमंडळ बसके उपरांत मुख्यमंत्री दो. प्रमोद सावंत हांणी पत्रकार परिशद घेतली. ह्या वेळार मंत्रीमंडळांत घेतिल्ल्या म्हत्वाच्या निर्णयांची म्हायती तांणी दिली. खांडोळ्यांतल्या म्हाविद्यालयाची दुरुस्ती करपाचोय प्रस्ताव तातूंत आसपावीत केला. पूण कांय वर्सां आदीं बांदिल्ल्या ह्या महाविद्यालयाक इतले बेगीन दुरुस्तीची गरज कित्याक पडली, असोय प्रस्न जायत्या जाणांक पडलो.
खांडोळा महाविद्यालय गोंयांत शिक्षणाच्या मळार सगळ्यांत वयर आसा. मेळिल्ले म्हायती प्रमाण, जूनांत नॅकच्या (राष्ट्रीय मूल्यांकन आनी मान्यता परिशद) शिश्टमंडळ खांडोळेंच्या सरकारी कला, विज्ञान आनी वाणिज्य म्हाविद्यालयाची पळोवणी करतलें. शिक्षणाच्या मळार आपलें समर्पण दाखयिल्ल्यान ह्या म्हाविद्यालयाक फाटल्या पांच वर्सांत एन.आय.आर.एफ. चो पुरस्कार फावो जाला. ताणें सातत्यान 101 ते 150 ह्या श्रेणींत क्रमांक मेळयला. ह्या कारणाक लागून फाटल्या वर्सा जुलयांत नॅक वतीन (राष्ट्रीय मूल्यांकन आनी मान्यता परिषद) हांणी म्हाविद्यालयाक 3.45 सीजीपीए आनी ए+ रेटिंग दिल्लें.
हें मानांकन फुडली पांच वर्सां कायम उरतलें. म्हाविद्यालयाचे कर्मचारी, विद्यार्थी, मुळावी बांदावळ, अभ्यासक्रमाची गुणवत्ता मतींत घेवन हे गूण दितात. हें रेटिंग मेळोवपा खातीर शिक्षक, बिगर शिक्षक कर्मचारी, आनी विद्यार्थ्यांक कश्ट करचे पडटात. म्हाविद्यालयान मेळयल्ली क्रमवारी तिगोवन दवरप हेंय एक आव्हान. जूनांत गोंयांत येवपी नॅकाचे शिश्टमंडळ वयल्या जायत्या निकशांचेर तशेंच हेर जायत्या निकशांचेर आदारून म्हाविद्यालयाच्या दर्ज्याचें मुल्यांकन करतले. ह्या आदाराचेर फुडले निश्कर्श काडटले.
मजगतीं, म्हाविद्यालयांतल्या नव्यान बांदिल्ल्या ब्लॉकाची स्थिती वायट दर्ज्याच्या बांदकामाक लागून इबाडल्या. तशेंच कांय कडेन दुरुस्तीचीय गरज आसूं येता. येवपी अधिवेशनांत चर्चा करून निमाणे थारायतले. आनी उपरांत मे म्हयन्याच्या निमाणे मेरेन म्हाविद्यालयाचें दुरुस्तींचे काम पुराय करपाक सुरवात करपाची शक्यताय आसा.
मंत्रीमंडळाचे बसकेंतले हेर निर्णय
० एसईझेड खातीर केरी भूतखांब पठाराचेर सिप्लाक दिल्ली जमीन सरकारान परत घेतली.
० गोंय वॅट दुरुस्ती विधेयक मंजूर.
० आदिवासी विद्यार्थ्यां खातीर मुख्यमंत्री शिक्षा साहाय्य येवजणेची जातली कार्यवाही.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
