भांगरभूंय | प्रतिनिधी
नवी दिल्ली, खबरां संस्था ः संवसारांत क्षयरोग म्हळ्यार ट्यूबरक्यूलॉसिस (TB) हो संवसारात जायत्या जाणांच्या मरणाक कारण थारपी एक संसर्गजन्य दुयेंस. संवसारीक भलायकी संघटनेच्या आंकड्यां प्रमाण 2023 वर्सा संवसारभर सुमार 12 लाख 5 हजार लोकांक ह्या दुयेंसाक लागून मरण आयलें.
टीबी हो दुयेंस मायकोबॅक्टेरियम ट्यूबरक्यूलॉसिस ह्या बॅक्टेरिया पसून जाता. हो बॅक्टेरिया दुयेंतीच्या पुलमांवांचेर लक्ष्य करता. हाचो संसर्ग जाल्ल्या दुयेंतींच्या खोंकली, शिंक, थूक हांचे वरवीं हो दुयेंस पातळटा. टीबीची लागण जाल्ल्या आनी टीबीक लागून मरण आयिल्ल्या देशांच्या वळेरेंत भारत पयल्या क्रमांकाचेर आसा. भारतांत दर मिण्टांक दोन दुयेंतींक टीबीक लागून मरण येता. अधिकृत सरकारी आंकडेवारी प्रमाण, भारतांतल्या 85 हजार दुयेंतींक 2023 वर्सा ह्या दुयेंसाक लागून मरण आयलां.
2015 वर्सा मरण आयिल्ल्या लोकां परस हो आंकडो 18 टक्क्यांनी उणो आसा. तशेंच 2023 वर्सा टीबीच्या दुयेंतींचो आंकडो 2015 वर्साच्या तुळेंत 17.7 टक्क्यांनी उणो जाला. ह्याच वर्सा संवसारीक भलायकी संघटनेन आपल्या वांगडी देशां सयत टीबी दुयेंसा आड झुजपाची मोहीम सुरू केली. हातूंत भारताचोय आस्पाव आशिल्लो.
संवसारांतल्यान टीबी दुयेंस ना करपाच्या हेतान 24 मार्च 2015 हो संवसारीक टीबी दीस म्हणून मनयलो. देखूनच फुडल्या कांय वर्सांत टीबी दुयेंसांची आंकडेवारीची 2015 वर्साच्या आंकड्यां कडेन तुळा करतात.
भारत सरकाराचें टीबी दुयेंसा आड झूज अजून चालू आसा, आनी ह्या दुयेंसाक आडावपा खातीर निधी आनी भलायकी सेवा वाडयतात अशें सरकारान सांगलां. टीबी दुयेंसा आड झुडपाची ही मोहीम अशीच चालू दवरतले आनी 2025 वर्साच्या निमाणे मेरेन भारताक टीबी मुक्त करतले असो दावो भारत सरकाराच्या कुटुंब आनी भलायकी कल्याण मंत्रालयान फाटल्या नोव्हेंबरांत परतून एक फावट केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
