गोंयांत २९ जानेवारी ते १ फेब्रुवारी मेरेन एनएसडीचो ‘भारत रंग’ महोत्सव
भांगरभूंय | प्रतिनिधी
पणजी: गोंयांत २९ जानेवारी ते १ फेब्रुवारी ह्या काळांत नॅशनल स्कूल ऑफ ड्रामा (एनएसडी) ‘भारत रंग महोत्सव’ हो नाट्य महोत्सव आयोजीत करता. २९ जानेवारीक सांजेवेळार ६ वरांचेर पणजे कला अकादमीच्या मा दीनानाथ मंगेशकार कला मंदिरांत ह्या महोत्सवाचें उक्तावण मुख्यमंत्री प्रमोद सावंत हांचे हस्तुकीं जातलें. कला आनी संस्कृती संचालनालयाच्या सहकार्यान आयोजीत केल्ल्या ह्या महोत्सवाक चार नाटकां जातलीं. गिरीश कर्नाड हांच्या ‘नागमंडल’ ह्या नाटकान हो महोत्सव सुरू जातलो.
‘भारंगम’ ह्या नांवान वळख आशिल्लो भारत रंग महोत्सव हो संवसारांतलो सगळ्यांत व्हडलो नाट्यमहोत्सव. ‘एक रंग, श्रेष्ठ रंग’ (एक अभिव्यक्ती, सर्वोच्च निर्मिती) हे संकल्पने खाला भारत रंग महोत्सव आयोजीत केला. अभिनेते आनी एनएसडीचे आदले विद्यार्थी राजपाल यादव हे अंदूंचे रंग दूत (फेस्टिव्हल अॅम्बेसेडर) आसात.
२८ जानेवारी ते १६ फेब्रुवारी ह्या २० दिसांच्या काळांत भारत रंग महोत्सवांत भारता सयत णव देशांतलीं २०० परस चड नाटकां सादर करतले. भारतांत ११ सुवातांचेर आनी परदेशांत काठमांडू आनी कोलंबो ह्या दोन सुवातांचेर हो महोत्सव जातलो. महोत्सवाचो केंद्रबिंदू आशिल्ल्या दिल्ली सयत भारतांत गोंय, आगरतळा, अहमदाबाद, भटिंडा, बंगळुरू, भोपाळ, गोरखपूर, जयपूर, खैरागड आनी रांची हांगा नाटकां सादर जातलीं. ह्या महोत्सवांत आंतरराष्ट्रीय रंगमाचयेर कार्यरत आशिल्लो नाट्य पंगड वांटेकार जातलो. हातूंत रशिया, इटली, जर्मनी, नॉर्वे, झेक रिपब्लिक, नेपाळ, तैवान, स्पेन आनी श्रीलंका ह्या देशांतल्या नाट्य पंगडांचो आसपाव आसा.
भारत रंग महोत्सवाक सादर जावपी नाटकां
१. बुधवार, २९ जानेवारी
नाटक : नागमंडल, वेळ : सांजेचीं ६ वरां , लेखक : गिरीश कर्नाड, अनुवाद : बी. आर. नारायण, दिग्दर्शक : अमित सनौरिया आनी सरवर अली, पंगड : सात्विक आर्ट सोसायटी, चंडीगढ, भाशा : हिंदी, काळ : ११० मिनटां
२. बिरेस्तार, ३० जानेवारी
नाटक : पालशेतची विहीर, वेळ : सांजवेळ ६:३० , लेखक : विजयकुमार नायक, दिग्दर्शन : दीपक आमोणकार, नाट्य समूह : रुद्रेश्वर पणजी, भाशा : मराठी
काळ : ११० मिनटां
३. शुक्रार, ३१ जानेवारी
नाटक : माई री मैं का से कहूँ, वेळ : सांजवेळ ६:३०, लेखक : विजयदान देठा, दिग्दर्शक : अजय कुमार, नाट्य पंगड : एनएसडी रेपर्टरी, नवी दिल्ली, भाशा : हिंदी
काळ : ११० मिनटां
४. शेनवार १ फेब्रुवारी
नाटक: बाबूजी, वेळ : सांजवेळ ६ वरां, लेखक : मिथिलेश्वर, रूपांतर : विभांशू वैभव, दिग्दर्शक : राजेश सिंग, पंगड : एनएसडी रेपर्टरी, नवी दिल्ली. भाशा : हिंदी
काळ : ११० मिनटां
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
