भांगरभूंय | प्रतिनिधी
अमृतसर, खबरां संस्था: पंजाबांतल्या अमृतसराक आयतारा प्रजासत्ताक दिसा एका तरणाट्यान डॉ. भीमराव आंबेडकर हांचो पुतळो फोडपाचो यत्न केलो. पुतळ्याक फुलांचो हार अर्पण करपा खातीर लायिल्ले निसणीवेल्यान तो तरणाटो चडलो. ताणें पुतळ्याचेर हातोडेन वार करपाक सुरवात केली. हाका लागून पुतळो तुटलो. ताणें २४ सेकंदांत ८ फावटीं हातोडी मारली. पुतळ्या लागसारा दवरिल्लें संविधानूय फोडपाचो यत्न केलो.
तेन्ना लोकांनी त्या तरणाट्याक धरून बरोच बडलो. हे विशींची म्हायती पुलिसांक दिली. पुलीस स्टेशना कडल्यान देडशें मिटराच्या अंतराचेर आशिल्ल्या हॅरिटेज स्ट्रीटचेर ही घडणूक घडली. प्रकाश अशें तरणाट्याचें नांव. तो धरमकोटचो.
कॉंग्रेस फुडारी प्रताप सिंह बाजवा हांचे बगर मंत्री कुलदीप सिंह धालीवाल, आमदार डॉ. इंद्रबीर सिंह निज्जर आनी आमदार जीवनज्योत कौर आयतारा रातींच दाखल जाले. धालीवाल हांणी पुलीस आयुक्तां कडेन उलोवप जाल्ल्याचें सांगलें. ह्या प्रकरणांत बारकायेन चवकशी करतले.
दुसरे कडेन, श्रीराम हांगाच्या महास्नान वेवस्थापन समितीचे अध्यक्ष पवन द्रविड हांणी आयज अमृतसर बंद दवरपाचो उलो मारला. हे घडणुकेक लागून पुराय दलीत समाजांत तिडकीचें वातावरण पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
