भांगरभूंय | प्रतिनिधी
गोंय सरकाराचे यशदामिनी पुरस्कार २००१ वर्सा सुरु जाले. पयलेच फावट एकादऱ्या मळार जैत मेळोवपी अस्तुरेक उर्बा दिवपाक. ताची सुरवात आंतरराष्ट्रीय महिला दिसा जाली. सुवाळो पणजेच्या कांपाल मैदानार.
गोंयची पयली मुख्यमंत्री शशिकलाताई काकोडकार, अस्तुरी सहकारी बँक, अखील भारतीय महिला परिशद, गोंय फांट्याची संचालक लिबिया लोबो सरदेसाय, ग्रामीण विकास यंत्रणेती पयली संचालक आशा सावर्डेकार, पयली अस्तुरी नगराध्यक्ष कमलिनी पैंगीणकार आनी हेर पन्नासां वयर अस्तुऱ्यांचो तातूंत आसपाव आशिल्लो. पुरस्काराचें वांटप सुरु जालें. माचयेर आशिल्ले आदले मुख्यमंत्री मनोहर पर्रीकार, आयचे शेतकाममंत्री रवी सीताराम नाईक. शशिकलाताईंन पुरस्कार घेवपाक न्हयकार कळयल्लो. सुवाळ्याक ती हाजीर नाशिल्ली. जांकां काल रातीं पद्मश्री पुरस्कार फावो जाला ती लिबिया लोबो सरदेसाय. आमच्या सगल्यांच्यो लीबीबाय. ती माचयेर गेली, पुरस्कार घेतलो ना मात जोगूल साॅरी झांशीची राणी जाली.
लिबीबाय वामन सरदेसाय मुळांत आदवोगाद. आदले मुख्यमंत्री मनोहर पर्रीकार, प्रतापसिंह राणे हांचे कडेन झगडपी. पणजेच्या पासयेर चलत भोंवपी माथ्याक तोपी घालून. साडी आनी सलवार कमीज तांचो भेस. तांची म्हजी पयली वळख तांचे घरकार गोंयचे पयले आयआयएस अधिकारी पद्मश्री वामनबाब सरदेसाय हांची मुलाखत घेवंक गेल्लें तेन्नाची. वामनबाब (कवी अभिजीत)
आंगोलाचे राजदूत जाले तेन्ना तांची मुलाखत घेवपाक म्हाका ‘सुनापरान्त’ दिसाळ्याचे संपादप चंद्रकांतबाब केणी हांणी मडगांव सावन पणजे धाडलें. मुलाखत जाली, एक कप च्या आनी वामनबाबांचे एक पुस्तक लिबिबायन म्हाका भेटयलें. वामनबाबांची सय पुस्तकार आसा.
उपरांत लिबीबाय म्हजी मैत्रीण जाली. गोंयच्या सुटके झुजा पासत तांणी केल्लो वावर सासाय कविता झेल्याचे प्रस्तावनेंत कवी मनोहरराय सरदेसाय हांणी सांगलां. मुख्यमंत्र्यां कडेन झगडपी लिबीबाय गोरी, बावलेवरी. तिडकल्यार तिच्या दोळ्यांत इंगळे पळोवंक मेळटात. पणजेंत मेरी इमेक्युलेट इगर्जे लागीं कामत हाॅटेल आशिल्ले बिल्डिंगेत ती रावता. एके बिल्डिंगेच्या वण्टीर वचून बसल्या. गोंय म्हजें कशें तें सांगतात. लिबीबायक खबरय नासतलें आपूण वण्टीर पावल्या तें.
सुहासिनी प्रभुगांवकार
98810 99260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
