अशेय विचारवंत !!!

भांगरभूंय | प्रतिनिधी

दुसरे तरेचे अडेचे विचारवंत हे हुशार बी आसतात आनी तरणेपणा सावन लोक तांकां ‘असाधारण’, ‘जगावेगळो’ म्हणटात. मागीर तेय बी हवेंत चलतात. आपूण कोण तरी असाधारण ह्या भ्रमांतूच वावुरतात.

दुर्मीळ गजाल दरेकल्याक जाय जायशी दिसता. ‘विचारवंत’ अशें आपल्या नांवां मुखार लागचें अशें जायत्या जाणांक दिसता. पूण, मुळांत निजाचे विचारवंत खूब कमी आसतात आनी आपूण विचारवंत म्हूण भासोवपी चड आसतात. खऱ्या निजाच्या विचारवंतांक आपूण विचारवंत हें भासोवपाची गरज आसना. स्वताक नास्तीक म्हूण जाहीर करतकच आपूण विचारवंत जालों असो एक आपसमज आसा. आपूण देवळांत वचना, देवाक मानिना, दानपेटयेंत पयशे घालिना हें जाहीर करतकच आपल्याक बौद्धीक उंचाय येता अशें कांय जाणांक दिसता. अडेच्या विचारवंतांक नास्तीकपणाच्यो कुबड्यो जाय.
विचारवंत आसपाचो आस्तीक वा नास्तीक आसपा कडेन कांयच संबंद ना. तशेंच व्हडलो सुधारक बी जावपाक नास्तीक आसूंक जाय अशें ना. गांधीजी देव मानतालो. श्रीरामाचें नांव तांच्या ओंठार आसताले. हाचो अर्थ ते विचारवंत नाशिल्ले? सुधारक नाशिल्ले? तांच्या सारको विचारवंत आनी सुधारक संवसाराच्या फाटीर जल्मला? गांधीजीचें आस्तीक आसप तांच्या समाजकार्याच्या आड केन्नाच आयलें ना.
2020 त लेखक डॉ. एस एल भैरप्पा हांकां मेळपाचो योग आयलो. तांणी सांगलें, आपूण भारतांतल्या चडशा देवळांनी पावलां. देशा भायर शक्य आसा तितलीं देवळां पळयल्यांत. भारतांत भोंवतना आपूण देवळाच्या दान पेटयेंत आनी भटजीच्या ताटांत पयशे घालतांच. कारण देवळां हें आमचें सांस्कृतीक दायज आनी तें टिकपाक जाय.
भारतांतल्या एका सर्वश्रेष्ठ कादंबारीकाराक आपूण देवळांत वतां, दानपेटयेंत पयशें घालतां हें सांगपाक भंय दिसलो ना. कारण तांणी आपलें कर्तुब सिद्ध केलां. देवळांत वता म्हूण कोणूच तें विचारवंत न्हय अशें म्हणचो ना. डॉ. भैरप्पा हे निजाचे विचारवंत आनी भारताच्या साहित्याच्या इतिहासांतले एक सर्वश्रेश्ठ कादंबरीकार.
देव मानप वा ना मानप एखाद्याच्या कामाच्या आड येना. एक बरो मनीस जावपाक, सत उलोवपाक, अन्याया आड उलोवपाक मनीस आस्तीक काय नास्तीक हाचो कांयच संबंद ना.
दुसरे तरेचे अडेचे विचारवंत हे हुशार बी आसतात आनी तरणेपणा सावन लोक तांकां ‘असाधारण’, ‘जगावेगळो’ म्हणटात. मागीर तेय बी हवेंत चलतात. आपूण कोण तरी असाधारण ह्या भ्रमांतूच वावुरतात. अचकीत साठी जाता आनी तेन्ना तांकां कळटा अरे असाधाराणाचें ‘अ’ केन्ना ना जालां. आपूण चार चवगां सारको सादारण –सरसामान्य उरलो. मागीर कितेंय तरी धमाकेदार करुया. ‘आवट ऑफ द बॉक्स’ करपाच्या नादांत पिशेपणांत घडटात. लोक ताळयो मारपाच्या जाग्यार हांसूंक लागतात. पिशांत काडटात. आपूण कितेंय तरी नवें करतलों ह्या हेतान क्रांती घडोवंक भायर सरिल्ले, दुसऱ्याच्या हांसपाचो विशय जातात.
श्रेश्ट साहित्यीक वा व्हडलो विचारवंत जावपाक भाशेचो विपर्यास करपाक जाय म्हूण ना. अप्रतिम साहित्य बरोवपाक भाशेची तोड- फोड- मोड करून भलतेंच कितेंय तरी करपाची गरज ना. मान्यताय मेळयिल्ले भाशेंत साहित्य बरोवन व्हड जावं येता. मनीस केन्नाच असाधारण आसना. तो साधारणूच आसता. ताचें कर्तुब, कार्य, बुद्धी मात असाधारण आसता. तें कर्तुब सिद्ध करिनासतना कोणूच असाधारण बी जायना.
विचारवंत कसो आसता?
विचारवंत जेन्ना बरयता तेन्ना तें सगळ्यांक सारकेंच लागू जाता. ताचें भितर आत्मविस्वास आसता. उर्मटपणा आसना. तो भावनां दुखयना, जाल्यार दोळे उक्ते करता. कारण तो सगळ्या वटेन विचार करता. उथळ विचार करिना. तो सत दाखयता. प्रस्न करता आनी त्या प्रस्नाच्यो जापोय दिता.

संपदा कुंकळकार
9850149319