देशाचो फुडार घडोवपाक युवाशक्त सक्षम

भांगरभूंय | प्रतिनिधी

डॉ. प्रमोद सावंतः मुख्यमंत्रीपदाचे कारकिर्दींत कोंकणी खातीर आपलें व्हड योगदान

• दिवचले युवा महोत्सवाचें दबाज्यान उक्तावण

भांगरभूंय । प्रतिनिधी

दिवचलः देशाचो फुडार घडोवपाक युवाशक्त सक्षम आसा. ती देशाची प्रेरणास्थान आसा. तांणी साहित्य, शिक्षण, संस्कृतीचें जतन करून युवा महोत्सवाच्या माध्यमांतल्यान प्रतिभेक उर्बा दिवप, हो महोत्सवाचो हेतू आसा. मुख्यमंत्री ह्या नात्यान हे आदीं कोंकणी खातीर कोणेच करूंक ना इतलो वावर आपणे केला. कोंकणीचो सरकारी राज्यकारभारांत वापर, स्टाफ सिलेक्शनांत कोंकणीक सुवात, तशेंच देश पांवड्याचेर आनी संवसारीक पांवड्याचेर कोंकणी भास संस्कृतीक उर्बा दिवचे खातीर प्रामाणीक यत्न केल्यात, अशें मुख्यमंत्री डॉ. प्रमोद सावंत हांणी सांगलें. दिवचले आयोजीत 26 व्या युवा महोत्सवाच्या उक्तावण सुवाळ्यांत ते उलयताले.

कोंकणी भाशा मंडळाक सगळे तरेचो आदार दिला, कोंकणी भाशा मंडळाक बऱ्या दर्ज्याचें कार्यालय आनी हेर सुविधा दिल्या. आपूण खंयच उणो पडूंक ना. आयज ह्या युवा कोंकणी महोत्सवाक आपल्याक आयत्या वेळार निमंत्रण दिवन लेगीत कसलेच तरेचो अहंकार बाळगिनासतना कोंकणीचे सेवे खातीरूच आपूण हे कार्यावळीक हाजीर रावलां. आमी सगळ्यांक वांगडा घेवन वचप गरजेचें आसा. कोंकणीचो वावर, साहित्य, भास फुडें व्हरपा खातीर सरकार खंयच उणें पडूंक ना. तरणाट्यांक नव्यो नव्यो संदी उपलब्ध करचे खातीर आपलें सरकार बांदील आसा. हे आदीं कोणें करूंक अशे तरेचो वावर कोंकणीच्या उत्कर्शा खातीर आपणें केला. हे खातीर हांव म्हाकाच शाबासकी दिवचों ना, पूण स्वता सांगले बगर आपणें कितें केलां, तें दुसरो सांगचो ना, हे खातीर आपूण हे सुवातेर ह्या विवीध वावराचो उल्लेख केलो, अशें मुख्यमंत्री डॉ. सावंत हांणी सांगलें.

आपूण पुराय वेळ लोकां खातीर काम करपाचो वसो घेवन काम करता. हेवे- दावे कुशीक दवरून समेस्त गोंयकारांच्या हिता खातीर आपलें काम चालू आसा. हाचे खातीर कोणूच आपली तोखणाय करिना वा कोणीच आपली बाजू घेना जाल्यार पसून आपल्याक ताची पर्वा ना. आपूण प्रामाणीक जनसेवक म्हूण राज्याची धुरा समर्थपणान सांबाळपाचो यत्न करता. हे मुखार लेगीत कोंकणीचे सेवे खातीर, गोंयचे युवाशक्तीच्या हिता खातीर आपलो वावर चालूच आसतलो, अशें मुख्यमंत्र्यान स्पश्ट केलें.

कोंकणी भाशा मंडळ गोंय आयोजीत 26 वो गोवा युवा महोत्सव नारायण झांट्ये वाणिज्य म्हाविद्यालयाच्या मैदानाचेर आयोजीत केला. कोंकणी भाशा मंडळ, युवा जैतिवंत दिवचल आनी नारायण झांट्ये वाणिज्य म्हाविद्यालय हांच्या जोडपालवान हो सुवाळो दोन दीस चलतलो. कवाथ्याक उदक घालून मुख्यमंत्री डॉ. सावंत हांणी ह्या महोत्सवाचें उक्तावण केलें. ह्या वेळार माचयेर समितीचे येवकार अध्यक्ष आमदार डॉ. चंद्रकांत शेट्ये, मानाचे सोयरे आमदार प्रेमेंद्र शेट, कोंकणी भाशा मंडळाची अध्यक्ष रत्नमाला दिवकार, उपाध्यक्ष रुपेश ठाणेकार, प्रा. राजेंद्र कुंभारजुवेंकार, आनंद बांबोळकार, तन्वी पळ, मानसी पावसकार हाजीर आशिल्ली.

येवकाराच्या उलोवपांत डॉ. शेट्ये हांणी सांगलें, कलेची भूंय आशिल्ले दिवचलेंत युवाशक्तीचो गजर घुमता. योग्य संस्कार, आचार- विचार हांकां पाळो दिवन देशाचे जडणघडणींत युवा शक्तीन योगदान दिवचें. डिग्री वांगडाच समाज, देश म्हत्वाचो आसा. जिविताचे परिक्षेंत येस मेळचें हे खातीर युवाशक्तीन योगदान दिवचें. घुंवळी वखदां गांवचे शिमेर पावल्यात. तरणाट्यांनी ताचे आड आवाज काडून व्यसना पासून पयस रावचें. युवाशक्त संघटीत जाली जाल्यार कितेंय करपाक शकता. हे खातीर ही उर्जा विधायक आनी देशाच्या हिता खातीर वापरची, अशें तांणी सांगलें.

आमदार शेट हांणी सांगलें.

युवा उत्सव उर्जा आनी सामर्थ्याचो सांगोड. गोंय आनी केंद्र सरकार तरणाट्यांची जतनाय घेता. देश उदरगतीचे वाटेर व्हरचे खातीर युवाशक्त संघटीत जावप गरजेचें आसा. अपेसाक भियेवचें न्हय, कारण ताच्या फाटल्या येस लिपिल्लें आसता. हाचें भान युवाशक्तीन दवरचें आनी पावलां मारचीं.

रत्नमाला दिवकार हांणी सांगलें, युवाशक्तीक लागून वावराक बळ येता. म्हादय खातीर संघर्श, कोंकणी शाळा सुरू करचे खातीर युवा वावुरता. तांचो फुडार पर्जळीत आसा, अशें तांणी सांगलें.

ह्या वेळार राजेंद्र कुंभार जुवेंकार, रुपेश ठाणेकार हांणी मार्गदर्शन केलें.

ह्या वेळार मुख्यमंत्री डॉ. सावंत हांचे हस्तुकीं नंदन कुंकळकार हांकां युवा पुरस्कार भेटयलो. ओमकार च्यारी हांणी येवकार गीत सादर केलें. ऐस्वर्या नायर, ब्रिजेश शेट्ये हांणी सुत्रसंचालन केलें.

दोमन दीस चलपी ह्या युवा महोत्सवांत शिक्षणीक संस्था आनी विवीध गटां खातीर साबार सर्ती आयोजीत केल्या. पयल्या दिसा आयलें तशें गायलें (चांचणी फेरी), कोंकणी पॉप, लोकनाट्य, धीक थै (चांचणी फेरी), प्रस्नमाची (चांचणी फेरी), शुटींग, फास्की अश्यो साबार सर्ती जाल्यो.

युवा महोत्सवांत गोंयच्या गिरेस्त सांस्कृतीक दायजाचें दर्शन घडोवपी भव्य मिरवणूक काडली.

अस्मिताये खातीर प्रत्यक्ष कामः मुख्यमंत्री

कोणेतरी म्हजो जयजयकार करचो म्हणून ‘म्हाका गोंयचे अस्मितायेचें चड पडलां’, अशें उलोवन दाखोवपाची गरज ना. हांवें अस्मिताये खातीर प्रत्यक्ष काम करून दाखयलां. अस्मितायेच्यो गजाली उलोवपी खूब आसतले. पूण, प्रत्यक्षांत सत्तेचेर येतकच तांकां ताचो विसर पडला. म्हज्या कार्यकाळांत अस्मिताये खातीर काम जाता, तें हाचे पयलीं कोणें केलां आसतलें, अशें दिसना, अशें मुख्यमंत्री डॉ. प्रमोद सावंत हांणी सांगलें.

मुख्यमंत्र्यान आयोजकांची घेतली ‘शाळा’

गोवा युवा महोत्सवाच्या उक्तावण सुवाळ्यात भाषण करतांना मुख्यमंत्री डॉ. प्रमोद सावंत हांणी आयोजकांची शाळा घेतली. निमाण्या खिणाक आपल्याक सांगून लेगीत, कोंकणीचो मोग आसा म्हूण राग कुशीक दवरलो. आपल्याक अहंकार ना. आपूण आपलें पद तरणाट्यां खातीर आनी गोंया खातीर भुशयता. त् खातीर अहंकार कुशीक दवरून आपूण आयलां. खरे म्हणल्यार आमचो नाटेकारबाब (दिवचलचो नगराध्य गुरुदास नाटेकार) वयर आसपाक जाय आसलो. आयोजकांनी ताची दखल घेवची कारण तो दिवचलचो पयलो नागरीक आसा. तांचो मान तांकां दिवप हें तितलेंच गरजेचें आसा आनी हो तुमी दिवचो. कारण हीच शिस्त आमची भुरगीं जिणेंत आपणायतात, अशें मुख्यमंत्र्यान सांगलें.

आयच्यो कार्यावळी

माची दोन : मुस्तायकी (चांचणी फेरी) सकाळीं 10 ते दनपारां 12.30 मेरेन. मुखेल माची:  धीक थै, सकाळीं 9.30 ते 11 (फकत शिक्षण संस्था), प्रस्नमाची- सकाळीं 11 ते दनपारां 2, मुलाखत- दनपारां 2 ते 3,  फास्केची पावणी- दनपारां 3 ते 3.30 मेरेन, मुस्तायकी- दनपारां 3.30 ते सांजे 5 मेरेन. समारोप सुवाळो सांजे 5 ते 5.30 वरांचेर जातलो.