मुख्यमंत्री म्हूण हांवें म्हज्या कार्यकाळांत कोंकणीच्या मळार व्हड योगदान दिलांः मुख्यमंत्री

भांगरभूंय | प्रतिनिधी

दिवचले 26 व्या गोवा युवा महोत्सवाचें मुख्यमंत्र्यां हस्तुकीं जालें उक्तावण

दिवचल, प्रतिनिधी ः तरणाटी पिळगी ही देशाची प्रेरणा आनी तांणी साहित्य शिक्षण आनी संस्कृताय तिगोवन दवरून महोत्सवा वरवीं तांचे कलेचे योगदान दिवप हो ह्या महोत्सवाचो हेत आसा. मुख्यमंत्री म्हूण हांवें हेरां परस चड कोंकणी खातीर योगदान दिलां. तशेंच सरकारी प्रशासनांत कोंकणीचो वापर, स्टाफ सिलेक्शन कोंकणी खातीर सुवात, राष्ट्रीय आनी जागतीक पांवड्यार कोंकणी भाशा संस्कृताय वाडोवपाचे प्रामाणीक यत्न हांवे केलां अशें मुख्यमंत्री डॉ. प्रमोद सावंत हांणी सांगलें. आमी कोंकणी भाशा मंडळाक सगळे तरेचो पालव दिला. तशेंच मंडळाक बऱ्या दर्जाचें कार्यालय आनी हेर सुविधाय दिल्यात अशेंय तांणी सांगलें.
कोंकणी भाशा मंडळ गोंय, युवा जैतिवंत दिवचल आनी झांट्ये म्हाविद्यालय हांच्या जोडपालवान 26 वो गोवा युवा महोत्सव दिवचलच्या नारायण झांट्ये वाणिज्य म्हाविद्यालयाच्या मैदानाचेर आयोजीत केल्या युवा महोत्सवाच्या उक्तावणा वेळार मुख्यमंत्री उलयतालें. ह्या वेळार अध्यक्ष चंद्रकांत शेटये, आमदार प्रेमेंद्र शेट, कोंकणी भाशा मंडळाची अध्यक्ष रत्नमाला दिवकार, उपाध्यक्ष रुपेश ठाणेकार, प्राचार्य राजेंद्र कुंभारजुवेकार, आनंद बांबोळकार, तन्वी पळ, मानसी पावसकार आनी हेर मानेस्त हाजीर आशिल्ले.
युवा कोंकणी महोत्सवाक ऐन वेळार आपयलो तरी आपूण कसलोच अहंकार बाळगिनासतना फकत कोंकणीचे सेवे खातीर हे कार्यावळीक हाजीर रावलो अशें युवा महोत्सवाच्या उक्तावण सुवाळ्यांत उलयतना मुख्यमंत्र्यान सांगलें. ह्यान फुडेंय कोंकणी लोकांचे सेवे खातीर तशेंच गोंयकार तरणाट्यांच्या फायद्या खातीर आपलें काम चालूच उरतलें अशें मुख्यमंत्र्यांनी स्पश्ट केलें.
ह्या वेळार लोककलाकार नंदन कुंकळ्येंकार हांकां मुख्यमंत्री डॉ. सावंत हांणी युवा उर्बा पुरस्कार भेटयलो. ओंकार चारी हांणी येवकार गीत सादर केलें. जाल्यार सूत्रसंचालन ऐश्वर्या नायर, ब्रिजेश शेट्ये हांणी केलें.