भांगरभूंय | प्रतिनिधी
नवी दिल्ली, खबरां संस्था ः कर्मचारी भविष्य निधी संघटना म्हळ्यार एम्पलॉईज प्रॉव्हिडंट फंड ऑर्गनायझेशनान नोव्हेंबर म्हयन्याचो पे रोल डेटा जाहीर केला. ह्या डेटा प्रमाण नोव्हेंबर म्हयन्यांत ईपीएफओ वांगड्यांची संख्या 14 लाख 63 हजारांनी वाडल्या. ऑक्टोबराच्या तुळेंत नोव्हेंबरांत 9.07 टक्क्यांनी वाड जाल्या. नोव्हेंबर 2023 वर्साच्या तुळेंत नोव्हेंबर 2024 वर्सा 4.88 टक्क्यांनी वाड जाल्या. ह्या आंकडेवारी प्रमाण देशांत संघटीत क्षेत्रांत नोकऱ्यो वाडत आसात हें स्पश्ट जाता.
ईपीएफओच्या आंकडेवारी प्रमाण, नव्यान जोडिल्ल्या खातेंधारकां मदीं 18 ते 25 वर्सां पिरायेच्या कर्मचाऱ्यांचो आंकडो चड आसा. नोव्हेंबरांत नव्यान नोंद जाल्ल्या वांगड्यांतले 54.97 टक्के वांगडी 18 ते 25 वर्सां पिरायेचे आसात. ऑक्टोबराच्या तुळेंत नोव्हेंबरांत हांतूत 9.56 टक्क्यांनी वाड जाल्या.
पेरोल आंकड्यांचें विश्लेशण केल्यार, नोव्हेंबर 2024 वर्सा ईपीएफओंत सामील जाल्ल्या खातेंधारकां मदीं 2.40 लाख बायलांचो आंकडो आसा. ऑक्टोबराच्या तुळेंत हो आंकडो 14.94 टक्क्यांनी वाडला. वर्सुकी आंकडेवारी पळयल्यार 23.62 टक्क्यांनी वाड दिसून आयल्या.
राज्या प्रमाण आंकडेवारी पळयल्यार पांच राज्यां आनी केंद्रशासित प्रदेशांतल्यान नोंदणी टक्केवारी 59.42 टक्के आसा. पांच राज्यांनी वांगड्यांची संख्या 8.69 लाख आसा. सगळ्यांत चड ईपीएफओ वांगडी जोडपाच्या मळार महाराष्ट्र पयल्या क्रमांकाचेर आसा.
मजगतीं, खातेंधारकांच्या सोयी खातीर फुडल्या दिसांनी ईपीएफओ जायते बदल करतले. तातूंत खातेंधारकांक एटीएम कार्डा वरवीं तांच्या पीएफ खात्यांतल्यान पयशे काडपाची सुविधा मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
