भांगरभूंय | प्रतिनिधी
मडगांव : बाणावलेचे एके बायलेक व्हिडिओ कॉल करून आपूण दिल्लीचो गुन्यांव फांट्याचो अधिकारी आशिल्ल्याचें एका ठकसेनान सांगलें. ड्रग्ज विक्री प्रकरणांत तुमचें आयलां, तेन्ना हातूंतल्यान भायर पडपाक जाय जाल्यार पयशे धाड अशें ताणें मुखार सांगलें. भियेल्ले ते बायलेन पयशे धाडले उपरांत कांय वेळान तिका आपूण फटविल्ल्याचें कळ्ळें. तिणें कोलवा पुलिशेंत हे विशीं कागाळ केल्या. तिणें सादारण साडेचार लाख रुपया ताका धाडल्यात.
राज्यांत सायबर गुन्यांवांचीं प्रकरणां दिसान दीस वाडतूच आसात. ते बायलेक दुबावितान आपलें नांव विकास प्रसाद आशिल्ल्याचें सांगलें. ते बायलेची मुळावी म्हायती तिका सांगून आपूण खरेंच गुन्यांव फांट्यांत आशिल्ल्याचो विस्वास दाखयलो. उपरांत ताणें ती ड्रग्सच्या खरेदी- विक्री प्रकरणांत गुंथिल्ल्याचें सांगलें. दुबावितान बायलेक कारवायेचो भंय दाखयत, ह्या प्रकरणांतल्यान सुटका करपा खातीर पयशे धाडपाक सांगलें. बायलेन ताणें दिल्ल्या खात्याचेर ४ लाख ४१ हजारांची रक्कम धाडली. उपरांत परत कॉल केल्यार तो क्रमांक बंद आशिल्ल्याचें कळटाच तिका आपूण फटविल्ल्याचें कळ्ळें. कागाळ केले उपरांत कोलवें पुलिसांनी त्या मनशा आड गुन्यांव नोंद केला. पुलीस निरीक्षक रितेश तारी फुडलो तपास करतात.
मजगतीं, कांय दिसां पयलीं फातोड्डें पुलिसांनी मुंबयच्या तिगा दुबावितांक फातोड्डेंचे बायलेक पुलीस अधिकारी आशिल्ल्याचें सांगून फटयिल्ल्या प्रकरणांत अटक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
