भांगरभूंय | प्रतिनिधी
नवी दिल्ली, खबरां संस्था: केंद्र सरकारान कांय दिसां पयलींच आठव्या वेतन आयोगाच्या स्थापनेक परवानगी दिल्या. हाका लागून १ जानेवारी २०२६ सावन लागू जावपी आठव्या केंद्रीय वेतन आयोगा प्रमाण केंद्रीय कर्मचार्यांच्या पगार, निवृत्तीवेतन आनी भत्त्यांत वाड जातली. हाचो सुमार एक कोटी परस चड केंद्रीय सरकारी कर्मचारी आनी निवृत्त कर्मचार्यांक फायदो जातलो.
मजगतीं, आठव्या वेतन आयोगांत २.८६ चो फिटमेंट फॅक्टर आसपाक शकता, जाका लागून मासीक निवृत्तीवेतन धारकांच्या निवृत्ती वेतनांत व्हड वाड जावपाक शकता. २०१६ वर्सा लागू जाल्ल्या ७ व्या केंद्रीय वेतन आयोगांत २.५७ फिटमेंट फॅक्टर आशिल्लो, जाका लागून मूळ वेतनांत व्हड वाड जाल्ली. हातूंत केंद्र सरकाराच्या निवृत्त कर्मचार्यां खातीर उण्यांत उणें मूळ वेतन ९,००० हजार रुपया आसा, जाल्यार चडांत चड मूळ वेतन दर म्हयन्याक १,२५,००० इतकें आसा. जे सरकारी सेवेंतत सर्वोच्च पगाराच्या ५० टक्के आसा. सातव्या वेतन आयोगांत म्हारगाय सवलत अशे जायते फायदे मूळ निवृत्ती वेतनाच्या ५३ टक्के आसात. जाका लागून निवृत्ती वेतनधारकांक म्हारगायेचो फटको बसना.
मूळ निवृत्ती वेतन १८६ टक्क्यांनी वाडटलें
गिरायक किंमत निर्देशांका वरवीं मेजपी म्हारगाये कडेन जुळोवन घेवपा खातीर म्हारगाय सवलत दर दोन वर्सांनी सुदारीत करता, हाका लागून वाडपी खर्च आसून लेगीत निवृत्ती वेतनधारकांक क्रय शक्ती तिगोवन दवरपाक मेळटा. जर आठव्या वेतन आयोगांत फिटमेंट फॅक्टर २.८६ आसत, सध्या ९००० हजार रुपया आशिल्ल्या मूळ उण्यांत उणें निवृत्ती वेतन दर म्हयन्याक सुमार २५७४० रुपया इतलें जातलें. म्हळ्यार हातूंत सुमार १८६ टक्क्यांची वाड जातली. दुसरे कडेन चडांत चड निवृत्ती वेतन सध्याच्या १,२५,००० हजारां वेल्यान वाडून ३,५७,५०० प्रती इतलें जावपाक शकता.
१९४६त पयल्या वेतन आयोगाची स्थापना
१९४६ वर्सा केंद्रीय कर्मचार्यां खातीर पयलें वेतन आयोग स्थापन केल्लें. तेन्ना सावन, केंद्रीय सरकारी कर्मचारी आनी निवृत्तीवेतनधारकांक विवीध केंद्रीय वेतन आयोगांवरवीं तांच्या वेतन आनी निवृत्तीवेतनांत विवीध सुदारणां करतात. सरकारी कर्मचार्यांच्या वेतनाची म्हारगाय आनी अर्थीक बदलां कडेन मेळ घालपाक वेतन आयोग स्थापन केल्लें.
मजगतीं, २८ फेब्रुवारी २०१४ दिसा सातवो वेतन आयोग स्थापन केल्लो. ताची शिफारशी १ जानेवारी २०१६ सावन लागू केल्यात. ह्या वेतन आयोगावरवीं केंद्रीय सरकारी कर्मचार्यांचेंचें मूळ वेतन ७,००० रुपयां वेल्यान १८,००० रुपया केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
