भांगरभूंय | प्रतिनिधी
नावेले दोन अपघात; थळाव्यां कडल्यान कारवायेची मागणी
मडगांवः खाजगी बस चालक चड प्रवासी मेळचे खातीर गतीन गाडी चलयतात आनी दुसऱ्या खाजगी बशींक मुखार वचूंक दिनात. ह्याच प्रकाराक लागून नावेले एका बसीन मोटारीक जाल्यार दुसरे एके बसीन दुचाकीक धपको दिल्ल्याची घडणूक बिरेस्तारा सकाळीं घडली. उपरांत थळाव्यांनी पुलीस आनी जिल्हो प्रशासना कडेन खर कारवाय करची अशी मागणी केली.
राज्यांतल्या खाजगी बस चालकांच्यो खूबशो कागाळी येत आसात. खाजगी बस चालकां कडल्यान चडांत चड प्रवासी आपले बशींत येवचे हे खातीर चडाओड सुरूच आसता. हाचे आदीं आकें वाठारांत रेल्वे स्टेशना कडेन वचपी खाजगी बसीच्या कंडक्टरा कडल्यान प्रवाशांक आपले बशींत घेवपा खातीर हाताक धरून ओडपाचे प्रकारूय जाल्यात.
बशीत प्रवासी उबे आसून लेगीत प्रवाशांक बशीत चडयतात. चड प्रवासी जायत जाल्यार चड पयशे मेळटले हे आशेन एकाच मार्गार चलपी खाजगी बशीं मदीं चडाओड लागता. मुखार वचपी बस फाटल्यान येवपी बशीक ओव्हरटेक करूंक दिना. ताका लागून रस्त्यारूच तांची सर्त सुरू जाता आनी अपघात घडटात.
नावेले बिरेस्तारा सकाळीं असोच प्रकार घडलो. मडगांव सावन कुंकळ्ळी वचपी खाजगी बशींत मुखार वचपा खातीर चडाओड सुरू जाली तेन्ना मुखा वेल्या मोटारींचो अदमास तांकां आयलो ना. एका खाजगी बशीन इनोव्हा मोटारीक फाटल्यान धपको दिलो जाल्यार दुसरे एके बशीन दुचाकीक धपको दिलो. ह्या दोनूय अपघातांत कोणाकूच गंभीर दुखाप जाली ना. पूण थळाव्यांनी ह्या खाजगी बशींचे सर्तींत हुस्को उक्तावन पुलीस प्रशासनान आनी जिल्होधिकारी कचेरेन हाची दखल घेवन कारवाय करपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
