भांगरभूंय | प्रतिनिधी
सकाळच्या सत्रांत कार्नावाल, शिगमो उत्सव, स्थायी समितीची बसका
भांगरभूंय । प्रतिनिधी
म्हापशें: म्हापशेंचे म्हापशें कार्नावाल समिती आनी म्हापशें शिगमो उत्सव समितीची निवड बसके सयत पालिकेच्या वर्सुकी अदमासपत्रका संबंदांत स्थायी समितीची बसका, अश्यो एकाच दिसा तीन मॅराथॉन बसकांचें आयोजन म्हापशें पालिकेन केलां. ह्यो तिनूय बसका शुक्रारा 24 जानेवारीक सकाळच्या सत्रांत जातल्यो.
सरकारान कार्नावाल आनी शिगमो उत्सव समितीची निवड करून धाडपाची सुचोवणी म्हापशें नगरपालिकेक केल्या. ते प्रमाण नगराध्यक्ष डॉ. नुतन बिचोलकार हांणी ह्या बसकांचें वेळापत्रक निश्चीत केलां. नगरसेवक आनी संबंदीत भागधारकांक हे बसकेक हाजीर रावपाची तांणी विनवणी केल्या. ह्यो तिनूय बसका नगराध्यक्षाच्या कॅबिनांत जातल्यो.
म्हापशें कार्नावाल समिती वेंचपा खातीर सकाळीं 10 वरांचेर बसका आयोजीत केल्या. जाल्यार म्हापशें शिगमो उत्सव समिती वेंचपा खातीर दनपारां 12.30 वारंचेर बसका आपयल्या. सकाळीं 11 वरांचेर पालिकेचे स्थायी समितीची बसका आपयल्या. हे बसकेंत 2025- 26 च्या अदमासपत्रकाचेर चर्चा जातली. स्थायी समितीचे बसकेक नगराध्यक्षा वांगडा समितीचे पांच वांगडी हाजीर रावपाक शकतात. तिनूय बसका एकाद्या मॅराथॉना वरी आयोजीत केल्ल्यान तिनूय बसकांक चड करून स्थायी समितीच्या बसकेंत चर्चे खातीर वेळ उणो पडटलो. म्हत्वाची अशी स्थायी समितीची बसका दुसऱ्या दिसा वा शुक्राराच सांजे वेळार आयोजीत करपाक जाय आशिल्ली, अशें मत समितीच्या वांगड्यांनी मांडून नाराजी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
