भांगरभूंय | प्रतिनिधी
म्हापशें पुलिशेची कारवाय: जीप, 59 हजार जप्त
भांगरभूंय । प्रतिनिधी
म्हापशें: बंजल मारून म्हापशेंच्या एका सराफाक एका लाखाची तोपी घालपी पनवेल महाराष्ट्रांतल्या भावोजी आनी मेवण्याक म्हापशें पुलिसांनी अटक केली. दुबावितांनी चोरये खातीर वापरिल्ली जीप तशेंच चोरयेंतले 59 हजार रुपया पुलिसांनी जप्त केल्यात. अटक केल्ल्या दुबाविता मदीं मनीष शशीकांत आंबेकर (47), शिवम मनिष आंबेकर (24), रवी श्रीपती चव्हाण (42), करण रवी चव्हाण (20) आनी यश रवी चव्हाण (20) हांचो आस्पाव आसा.
ही चोरयेची घडणूक मंगळारा 21 जानेवारीक सांजेच्या 4.35 वरांच्या सुमाराक घडिल्ली. ह्या प्रकरणांत भांगराच्या दुकानांतली सेल्सगर्ल रेश्मा ओगळे (रा. पुनोळा उसकय) हिणें पुलिशेंत कागाळ दाखल केल्या.
मनिषान म्हापशें मार्केटांतल्या एका नामनेच्या सराफा कडेन मोबायला वयल्यान संपर्क केलो. बायलेचो आवाज काडून आपूण मुथूट फायनान्स कंपनीची मॅनेजर उलयता अशें सांगलें. तशेंच आपले धुवेच्या लग्ना खातीर कांय वस्ती (दोन कांकणां) करपाच्यो आसात. ताका कितलो खर्च येतलो, अशी चवकशी केली.
सराफान ताका दोन लाख रुपया खर्च येतलो अशें सांगलें. उपरांत उलयता उलयता दुबावीत मनिषान सराफाक सांगलें, आपले कडेन 1 लाख रुपया रोख रक्कम आसा. तातूंत 50, 100 आनी 200 रुपयांच्यो नोटी आसात. तुमकां त्यो जाय, अशें विचारताच सराफान सकारात्मक जाप दिली. आपल्याक दुकानाचेर मोडचे पयशे लागतात. ताच्या बदल्यात आपूण 500 रुपयांच्यो नोटी दितां, अशें सांगताच दुबावितान ताका ताच्या मनशाक मुथूट फायनान्सच्या कार्यालयांत पयशे घेवन धाडपाक सांगलें.
थारिल्ल्या प्रमाण त्या सराफान आपल्या दुकानांतल्या सेल्सगर्ल कर्मचाऱ्या कडेन 1 लाख रुपया दिवन धाडलें. मुथूट फायनान्सच्या कार्यालयाचे इमारतीच्या प्रवेशदाराचेरूच दुबावीत मनिषान सराफान धाडिल्ल्या महिला कर्मचाऱ्याक नांवान उलो मारलो आनी तिचे कडल्यान 1 लाख रुपया घेतले. ताच्या बदल्यांतले पयशे वयर कार्यालयांत मेळटले, तशेंच वस्तींचें माप घेवचे खातीर वयर कार्यालयांत दुसऱ्या माळ्याचेर वच, अशें तिका सांगलें. इमारतीचीं सोंपाणां चडटना फिर्यादीच्या लक्षांत आयलें, मुथूट फायनान्साचें कार्यालय पयल्या माळ्यार आसा. ती फाटीं वळचे आदींच दुबावीत पयशे घेवन पळून गेल्लो.
फिर्यादीक आपली फटवणूक जाल्ल्याचें कळटाच ही घडणूक तिणें आपल्या धनयाक सांगली. ते उपरांत म्हापशें पुलिशेक म्हायती दिली. पुलिसांनी ती इमारत आनी हेर कडल्या सीसीटीव्ही कॅमेऱ्यांची फुटेज तपासली. तशेंच खात्रेच्या सुत्रांच्या म्हायतीच्या आदारान बुधवारा 22 जानेवारीक राती वेळार हे टोळयेक कळंगूटे ताब्यांत घेतली.
पुलीस निरिक्षक निखील पालेकार हाच्या मार्गदर्शना खाला उपनिरिक्षक बाबलो परब, दत्तप्रसाद पंडीत, हवालदार सुशांत चोपडेंकार, कॉन्स्टेबल प्रकाश पोळेकार, महेंद्र मांद्रेंकार, अक्षय पाटील, आनंद राठोड, लक्ष्मीकांत नायक आनी राजेश कांदोळकार ह्या पंगडान ही कामगिरी केली. फुडलो तपास पुलीस अधिक्षक अक्षत कौशल आनी उपअधिक्षक संदेश चोडणकार हांच्या मार्गदर्शना खाला पुलीस करतात. मनिष आंबेकर हो टोळयेचो मुखेली आसा आनी तो खापो गुन्यांवकार आसा. महाराष्ट्रांतल्या विवीध पुलीस स्टेशनांचेर ताचे आड फटवणुकेचे 9 गुन्यांव नोंद आसात. मनिष आंबेकार आनी रवी चव्हाण हे भावोजी- मेवणो आसात. हेर तिगूय दुबावीत तांचीं भुरगीं आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
