भांगरभूंय | प्रतिनिधी
दिवचलः 26 व्या गोवा युवा महोत्सवाच्या नगराक नामनेचे संगितकार आनी लोककलाकर सर्गेस्त आब्दोनिओ रॉड्रिगीस हांचें नांव दिलां. महोत्सवाच्या आयोजन समितीचे हालींच जाल्ले बसकेंत हो निर्णय जालो. संवसाराक अंतरिल्ल्या गोंयच्या कांय नामनेच्या आनी कोंकणी खातीर वावर केल्ल्या तशेंच गोवा युवा महोत्सवांत योगदान दिल्ल्या फुडार्यांक आर्गां ओंपपा खातीर महोत्सवाच्या विंगड विंगड माचयेंक कोंकणी फुडार्यांचीं आनी कलाकारांचीं नांवां दितात आनी महोत्सवा दिसा तांच्या घरच्यांचो भोवमान करतात. ह्या महोत्सवाक गोंय सरकाराच्या राजभाशा संचालनालयान अर्थीक आदार दिला.
कोंकणी कार्यकर्ता, शिक्षक आनी कोंकणी भाशा मंडळाचे आदले सचीव सर्गेस्त नित्यानंद नायक हांचें नांव मुखेल माचयेक दिलां. पत्रकार आनी लेखक सर्गेस्त अनंत साळकार हांचें नांव दरवट्याक दिलां. दुसरे माचयेक गायक जॉन्सन फर्नांडीस हांचें नांव दिलां. कार्यकर्ता सर्गेस्त राजेंद्र नायक हांचें नांव दालनाक दिलां. कलाकार आनी नाटककार डॉ. रेवणसिद्ध नायक हांचें नांव चौकाक दिलां.
मजगतीं, कोंकणी भाशा मंडळाच्या 26 व्या गोवा युवा महोत्सवाक सांस्कृतीक पंगड आनी शिक्षणीक संस्था मेळून 23 सर्तक पंगड नोंद जाल्यात. नमन, लोकमांड, आयलें तशें गायलें, धीक थै, लोकनाट्य, कोंकणी पॉप, शुटिंग, फास्की, रंगीत खोमीस, रीळ, खेळ, मुस्तायकी, प्रस्नमाची अश्यो विंगड विंगड सर्ती 25 आनी 26 जानेवारीक सर्वणच्या नारायण झांटये वाणिज्य म्हाविद्यालयांत जावपी ह्या महोत्सवांत जातल्यो. रीळ ही सर्त गोंय पर्यटन खात्यान पुरस्कृत केल्या. महोत्सवाच्या दुसर्या दिसा म्हणल्यार 26 जानेवारीक दनपारां 2 वरांचेर सरकारी अधिकारी गुरुदास शि. तु. देसाय आनी उद्देजक अंकुर काणकोणकार हांची मुलाखत जातली. ही मुलाखत ॲड. हृषिकेश कदम आनी सहाय्यक प्राध्यापक डॉ. तन्वी कामत बांबोळकार घेतलीं. गुरुदास देसाय हांणी मामलेदार, उपजिल्होधिकारी, राज्य निबंधक अशीं सरकारी पदां सांबाळ्ळ्यांत. सरकारी पातळीचेर कोंकणीचो वापर जावचो म्हणून ते वावुरतात. अंकुर काणकोणकार हे दिव्यांगत्वांच्या हक्कां खातीर वावुरतात. स्वता नेत्रहीन आसून लेगीत जिद्दीन शिक्षण पुराय करून तांणी स्वताची आय.टी. कंपनी स्थापन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
